آواران انتطامیہ مسلہ تے حل کننگ نا جاگہ تنگ کننگء۔ خاہوت نا شکایت
آواران آن پاکستانی لشکر نا دو آن زورانسری ئٹ بیگواہی نا گواچی مروکا دلجان بلوچ نا آجوئی کن برجاء انگا برانز اینو ہفتمیکو دے برجاءءِ، دا برانز 18 نومبر آ بناء مسس و دائسکان برجاءءِ ۔
برانزیک و انتظامیہ نا نیامٹ مذاکرات کیہی وار بے سہب مسنو، و برانزیک برانز ئے برجاء تخنگ نا پڑو کرینو۔
برانزی تا پاننگ ءِ کہ برانز ئنا سوب آن آواران ئٹ تیوعہ کرفیو نافذ کننگانے و اوفتے دیر و خوراک آن زبہر تخنگانے۔ خُلیس ءِ کہ انتظامیہ وار وار نیٹورک بند کرسا برانز ئے بے سُہب کننگ نا کوشست کننگءِ۔
تدوکا نن لشکر برانزئے تیوعہ گھیرہ کرے و برانزی تے تڑی تس کہ اگہ برانز ایسر کننگ متو گُڑا لاٹھی چارج کننگو۔ برانزی تا دا ہم پاننگ اسک کہ اوفتا شناختی کارڈ و موبائل فون تے پُھلنگ نا کوشست کننگانے، برانزی تے ہچ وڑ ئنا رکھ تننگ افس۔
یاتی مرے کہ آواران نا ہن و بر نا کسر تدوکا شش دے آن جتاء ہند آ تیان بند ءِ ۔ برانزی تا پاننگ ءِ کہ دا برانز دلجان نا آجوئی اسکان برجاء مرو و کسرک بند مرور۔
برانز ئٹی زالبول، چنا و کماش آک اوار ءُ۔ برانزیک کریر کہ آنسو گیس کارمرز کننگے، لاٹھی چارج مرے یا گولہ باری کننگے دا برانز دلجان بلوچ نا آجوئی اسکان ایسر مفرو۔
برانزیک وکیل،خوانندہ تنظیم و بندغی حق آتا ادارہ تیان خواست کریر کہ او دلجان بلوچ نا حق ئٹ توار بڑز کیر و برانزی تا رکھیفنگ کن گام ہرفیر۔ اوفتا پاننگ اسک کہ اوفتا اسٹ انگا خواست اَسہ بے گناہ ئسے نا آجوئیءِ۔
