بلوچستان نا ضلع قلات و مچھ ئٹی پاکستانی لشکر نا لشکر کشی برجاء، ہیلی کاپٹر آتا ہِن و بر ہم ارے۔
ہنوکا دے آن قلات نا مَشی سلسلہ ئٹ پاکستانی لشکر نا لشکر کشی برجاء، ہند آ تیٹ نیٹ بند کننگانے۔
لشکر کشی ئٹ پندہ ہنوکا کارندہ تیتون اوار ہیلی کاپٹر آک ہم بشخ ہلنگ ءُ، کیہی ہند آ تیا شیلنگ نا ہم حوال ءِ۔
بولان نا ہند مچھ ئٹی ہم اینو مُسٹمیکو دے لشکری آپریشن برجاءءِ۔
حوالکار آک پارینو کہ آب گم، گونی پرا و ایب کھیب ئنا ہند آک لشکر کشی نا پلویڑ ئٹی ءُ۔
کالخواک لشکری آپریشن نا حوالہ ئٹ دائسکان ہچ پاتنو ولے ہند ئٹی نیٹ ئنا بندی نا سوب آن نسخان تا حوالہ ئٹ معلومداری کننگ ٹی مشکل بننگءِ۔
یاتی مرے کہ بلوچستان نا ضلع قلات ئنا ہند جوہان ئٹی شاہ مردان نا ہند آ بلوچ لبریشن آرمی نا سرمچارآک جمعہ و ہفتہ نا نیامی شام پاکستانی لشکر نا کیمپ ئے اَسہ جلہو ئسیٹ نشانہ کریر ہرانا سوب آن ہفت لشکری کارندہ خلنگا و 18 ٹپی مسُر۔
جلہو نا زمہ واری بلوچ لبریشن آرمی ہرفینے، واہم بی ایل اے نا کُنڈان شابیتی درشان بروئی ءِ۔
