بلوچستان نا ضلع خضدار نا تحصیل وڈھ ئنا ہند کراڑو جانی چڑھائی نا ٹک آ نادُرست آ بندغ آک مہر اللہ محمد حسنی نا کاروان آ جلہو کریر جلہو ئٹی مہر اللہ محمد حسنی تون اوار اونا مُسہ ہمراہ خلنگانو۔
خلنگ مروکا بندغ آتا بابت ئٹ ہندن حوال ءِ کہ اوفک پاکستانی لشکر نا ہندی ڈیتھ اسکواڈ نا کارندہ مسُنو۔ دائسکان ایلو خلنگ مروکا تا پجار چائنگ متنے۔
ہندی حوال تروکا تا رد ئٹ سلاہ بند بندغ آک خلنگ مروک آتا سلاہ و مڈی تِہ ہم تینتون درینو۔
جلہو آن پد خضدار، بیلہ و ایلو ہند آتیان لشکری کارندہ آتا بھلو کچ ئس جلہو نا جاگہ غا سر مسُنے واہم سلاہ بند بندغ آک سلامتی ئٹ پیشتمانو۔
جلہو نا زمہ واری ئے دائسکان ہچو تنظیم ئس ہرفتنے۔
