بی ایل اے نا جارکش جیئند بلوچ میڈیا ٹی شنگ کروک تینا درشان ئسیٹی پارے کہ اینو سہب ئنا ہشت بجہ غا کوئٹہ ٹی بلوچ لبریشن آرمی نا فدائی یونٹ مجید بریگیڈ زرغون کسر نا خُڑک کوئٹہ ریلوے اسٹیشن آ رادہ مننگ کن تیار پاکستانی لشکر نا نان کمیشنڈ افسر آتا اسہ دستہ سے فدائی جلہو ئٹی ٹک کننگا۔ پاکستان نا کوزہ گیر لشکر تا کنڈ آن بلوچستان نا سرزمین آ برجاء غا کوزہ، زوراکی و بربریت و مستونگ ئٹی معصوم آ بلوچ چُنا تیا کروکا ظلم ئنا ورندی ترسا بی ایل اے نا مجید بریگیڈ نا جانباز فدائی شہید سنگت فدائی محمد رفیق بزنجو عرف وشین دشمن نا نان کمیشنڈ افسر آتا دستہ ئے ٹک کرے۔ دا جلہو ہموتم کننگا ہراتم دا لشکری کارندہ غاک دی اسکول آف انفنٹری اینڈ ٹیکٹکس کوئٹہ آن تربیت پورو کننگ آن پد جعفر ایکسپریس نا ذریعہ ئٹ تینا اُرا تیا ہننگ کن راہی اسُر۔ دا سرسوب کاروائی ٹی کم آن کم 31 لشکری کارندہ خلنگا و 40 آن زیات ٹپی مسُر۔
بی ایل اے نا مجید بریگیڈ نا فدائی جلہو ئٹی ٹک کننگوک دشمن لشکری کارندہ غا تا سیالی پاکستانی لشکر نا پنجاب رجمنٹ، ناردرن لائٹ انفنٹری رجمنٹ، سندھ رجمنٹ، فرنٹیئر فورس رجمنٹ، بلوچ رجمنٹ و آزاد کشمیر رجمنٹ آن اسک۔ ہرا کوئٹہ انفنٹری اسکول آن تربیت ہلنگ آن پد واپس ہننگ اسُر۔
دا سرسوبی تنظیم نا انٹیلیجنس ونگ “زراب”(زیفر انٹلیجنس ریسرچ اینڈ انالیسس بیورو) نا پیشہ ورانہ حکمت عملی و ناقابل تسخیر انٹیلیجنس لائخی تا سوب آن منکن مس۔
زراب دشمن نا ہر سُر پُر آ خُوڑتی ئٹ نظر تخسہ تہہ ئنا و پیشن نا ذرائع تے کارمرز کرسا حوال مُچ کرینے۔ دا آپریشن نا ڈٹ بندی کیہی دے آن برجاء اسک، ننا انٹیلیجنس دشمن نا سُر پُھر نا ہر پاسو تے ہرانو۔ ننے 08 نومبر آ جلہو نا وارخواہی رسینگا ولے شاری تا بھلو کچ ئس ساڑی اسک ہندا سوب آن دا کاروائی ئے مونی کننگا تاکہ بے ڈوہ آ ساہ تا رکھ یخینی مرے، پھگہ 10 نومبر آ پین اسہ دستہ سینا روانگی ارے ولے زراب ئے رسینگوکا حوال تا رد ئٹ پھگہ ہنوکا لشکری کارندہ غا تا کچ پنجہ نا کچ ءِ۔ اینو نا وارخواہی اونا مونٹی زیات گچین اسک و السی نسخان تا خلیس سخت کم اسک۔ زراب نا سرسوب انگا ڈٹ بندی و ننا تنظیم نا تاغت تخوکا لشکری و انٹیلیجنس حکمت عملی دا ہیت ئے پک کرینے کہ تحریک آجوئی بلوچستان نا تنیا دفاعی محاذ آ بلکہ انٹیلیجنس نا جہان ئٹی ہم بُڑز ہنانے۔ نن تینا سرزمین نا آجوئی کن ہر نہاد ئے تننگ کن تیار اُن، و ہم تینا الس ئنا رکھ ئکن ہچ وڑو قربانی سیان پد مفرون۔
دشمن لشکر آ بلوچ لبریشن آرمی دا سرسوب جلہو ئے تنظیم نا ایلیٹ فدائی یونٹ مجید برگیڈ “زراب” نا کُمک ئٹ پورو کرے۔ فدائی جلہو ئے کروک علی مراد نا مار شہید سنگت فدائی محمد رفیق بزنجو عرف وشین حب چوکی نا ہندی ئس اسک۔ فدائی رفیق بزنجو تِدوکا دہائی ئسے آن بلوچستان نا آجوئی نا جُہد ٹی سیاسی و عسکری کڑدار ادا کرینے۔ او 2013 ٹی سیاست نا بناء ئے بلوچ اسٹوڈنٹس آرگنائزیشن آن کرے، اوڑے او غیر فوجی و پرامن سیاسی سنگت آتا پاکستانی لشکر نا دوآن شہید و زوراکی ئٹ بیگواہی تے خنسہ ہندا سند آ سر مس کِہ بلوچستان ئٹی پرامن، جمہوری و عدم تشدد نا سیاست نا مُچ کسرک بند کننگانو۔ او 2017 ٹی بی ایل اے نا تلہ غان بحیثیت اربن گوریلا تینا جہد ئے بناء کرے و مشی محاذ آ بس۔ فدائی رفیق بزنجو 2023 آ تینا رضا ئٹ مجید برگیڈ ئٹ اوار مس و فدائی ئس مننگ نا کسر ئے گچین کرے۔ اسِہ سال ئنا سخت تربیت نا گدرینگا او 9 نومبر 2024 ئٹ سرسوبی ئٹ تینا مشن ئے پورو کرے۔ راج و وطن آ فدا مرسا دیہاڑ ئٹ امر مس۔
شہید فدائی سنگت رفیق برنجو نا جیرت، وطن دوستی و تینے راجی آجوئی کِن کربان کننگ نا لائخی شان تِس کہ بلوچ راج نا فرزند آک تینا سرزمین نا ننگ کِن ہر حد ئسکان ہننگ کِن تیار ءُ۔ شہید نا کربانیک دشمن ئے دا کلہو ئے تِسُر کہ بلوچستان نا آجوئی نا کسر نا مونا ہچو ہڑاند ئس بھلُن اف۔
فدائی رفیق بزنجو نا بے مٹ دلیری و وے لڑزوکا عزم نہ بیرہ دشمن ئے نُسخان تِس بلکہ ننا تحریک ئے اسِہ پوسکنو جوش ئس تِس۔ اونا دا عظیم انگا کربانیک ہر وخت یاد کُننگ مرور و برکا نسل کِن دلیری نا اسِہ بھلو مثیل ئس مرور۔
نن پاکستانی لشکر و ادارہ غاتے پھاش پانہ کہ اگہ بلوچستان نا سرزمین آ پاکستانی لشکر نا زوراکیک بند کُننگ متور و ننا سرزمین آن کوزہ ئے ایسر کتور و بے ڈوہ آ بلوچ اُلس ئنا زنک کشی برجاء مس تو بروکا جلہوک پین سخت و بھلُن مرور۔ اوفتا شدت پاکستان نا بُنجاہی شار تے اسکان محسوس کُننگ مرو۔ بلوچستان ٹی جوانی ہتنگ کِن زوت تینا لشکر تے کشِہ و بلوچستان نا آجوئی ئے منے۔ نن اِرا پُرامن ہمسایہ ڈیہہ ئنا وڑ ئٹ رہینگن۔ ننا تحریک امن خواہک۔ اگہ ظلم ئنا ورندی تننگ لازم مس تو نن پدی مفرون۔ بلوچ راج ئنا ہر بندغ تینا آجوئی و حق کِن جنگ کننھ نا عزم تِخک و اینو نا کاروائی دا ہیت ئنا پھاشو کلہو ئس ءِ کہ ننا آجوئی نا جوزہ ہچو تاغت ئسے نا مونا شیف مفک۔
ایسر ئٹ بلوچ لبریشن آرمی جہانی کہول ئے پاننگ خواہک کہ او بلوچ راجی جہد آجوئی نا دیہاڑ، فلسفہ و سیاسی ترجیحات آتے پوہ مننگ نا کوشست ئے کئر و بلوچ اُلس ئے دا قانودی و دفاعی جنگ ئٹی کُمک کیر۔ پاکستانی سرکار و اونا لشکر ئے دا یات مرے کہ بلوچ اُلس ئنا آجوئی نا اُست خواہی ہر ہنوکا دے تون ننا مزل پین خڑک مننگ ءِ۔
