ضلع کیچ ئنا علاقہ مند ئٹی مہیر نا الس تدوکا نُہہ دے آن ُمخلوق نا اُرا تیا پاکستانی لشکر نا کوزہ نا برخلاف کسر ئے بند کرسا برانز کننگ ءِ۔
مہیر نا الس ئنا خواست ءِ کہ پاکستانی لشکر مند ئنا خلق مہیر ئٹی اوفتا اُرا تیا تینا کوزہ ئے دمدستی ایسر کے و اوفتا اُرا تِہ ہورک کے ہرافتیا پاکستانی لشکر تدوکا پنچ سال آن کوزہ کرینے۔
استو ننکان تولوک برانز نا جہہ آ ایف سی تمپ ئنا بریگیڈیئر و ضلعی انتظامیہ برانزی تا کمیٹی تون تران کرے، اول او برونزی تِہ بھیم تننگ نا کوشست کریر ولے برانزیک تینا خواست آتیان پد متور ہراکان گڈ انتظامیہ اُرا تِہ ہورک کننگ کن شش تُو ئنا وخت خواہا ہرادے کمیٹی منیتو۔
ضلعی انتظامیہ نا نمائندہ رحیمہ جلال اسہ تُو ئنا وخت ئنا باور تس ہراڑا خلق ئنا بندغ آک دا شَڑت آ ہیت تران آ امنا کریر کہ علاقہ نا مسکوہی و ساڑی آ نمائندہ غاک، ڈی سی کیچ و کیچ بار ایسوسی ایشن ئے شاہدی کن اوار کننگو۔
یات مرے کہ بلوچستان نا جتا علاقہ آتا وڑ پاکستانی لشکر مند و تمپ ئنا جتا خلق آتیٹ آبادی تا تہٹی مخلوق نا اُرا تیا کوزہ کرینے و ہموکان آبادی تِہ سرویلنس کیرہ، ڈرون کیمرہ تِہ مخلوق نا اُرا تا زیہہ ئٹ پھیری تیرہ و مخلوق نا پرائیویسی ئے لتاڑِرہ۔
آبادی تا تہٹی پاکستانی لشکر نا ساڑی گری آن خاص وڑ ئٹ نیاڑیک فریشان ءُ، لشکری کارندہ غاک جتا وڑ ئٹ لس مخلوق ئے فریشان و بلیک میل کرسا اوفتیان کاریم ہلنگ نا کوشست کیرہ۔
