دا وختا سیاسی و چاگڑدی جہدکار اعجاز احمد بلوچ، علی احمد بلوچ، سلام بلوچ، عہباز احمد و سیٹھ علموت کیمپ آ بسر و اواری نا درشانی کریر۔
دا وختا وی بی ایم پی نا وائس چیئرمین ماما قدیر بلوچ پارے کہ زوراکی ئٹ بیگواہ کننگ، بےقانودی خلّنگ بٹِنگ و مخلوق آ جلہو کننگ کوزہ گیر ریاست آتا ساندہ نا کاریم مسّنے ولے ہراتم بلوچ راجی تحریک بھاز آ شیفی بُڑزی تیان مرسا مونا بس تو کوزہ گیر ریاست آمخ مرسا زوراکی تہِ زیات کرے ہرا داسکان برجاء ءُ۔ 2000 آن نومبر 2024 اسکان 80000 بلوچ ورنا زوراکی ئٹ بیگواہ کننگانو، اگہ کس ئے دا گْونشت آ شک ارے تو کنے آ برے ہڑدے نا بنداو آ کیہی بلوچ خوانندہ، سیاسی جہدکار و ایلو مخلوق ئے زوراکی ئٹ بیگواہ کننگک۔ حوال تا رِد ئٹ نوشکے ٹی سزا جاہ تا تفنگ کن بیست ہزار بوری سِمِٹ خْواہیفنگانے۔ دا اف کہ اوڑے ماڑی تفنگو بلکہ بیرہ 4×6 ئنا اسہ اسہ خانہ جوڑ کننگو، دا پکّو حوال ءُ۔
ماما قدیر بلوچ مُستی پارے کہ ہرا بندغ آک دشمن نا دیر ئے کُنسہ تینا ضمیر ئے بہا کرینو او وطن نا توار ئے بنپسہ، اوفتہ وخت ئنا فرعون نا بندی ٹی وطن نا چُنا تا دتر چُرّ آ ٹھپ آتا احساس اف۔ ٹُکرانگا جون تہ ہلوکا لمّہ غا تا فریات اوفتہ سرفپک۔ سینہ آتہ ڈرل کننگک و آجوئی کن بےکرار آ اُست آتہ کھپ کننگک تو دڑد ئس بش مریک۔ خف تیٹ و باء، بوز ئٹی دیر کروکو سُرف شاغنگک۔ تو دا نا مون ٹی مرگ اسہ گْوازی ئس چاننگک۔ دا دڑد و خاخر نا زور ئے چائنگ نا وس دشمن نا مرید آتیٹ اف ہرافتا رغ رغ ئٹی تینا جند ئنا مفاد آتا ہڑ جہہ کرینے۔ اوفتا زند پاکستانی پلیت انگا رشتہ ٹی تفنگانے اوفتیک غلامی نا تارمئی ٹی جہد ئنا بِلبلوکا چراغ ہچس اف۔ اوفتیک نن ئنا چُپی ٹی مَش تا چشمہ آتا ساز و زیمل بیرہ اسہ شور ئس ءِ۔
