فرازنہ رودینی، رخسانہ دوست، حفظہ بلوچ، صدف بلوچ و ادیبہ بلوچ اواری ئٹ پریس ریلیز ئسے نا زریعت ئٹ بندغی حق آتا لتاڑ و زوراکی نا بیگواہی نا بھلا ویل آ اقوام متحدہ و بندغی حق آتا جہانی تنظیم تا پام ئے تینا کنڈ آ کرسا پاریر کہ نن تینا بندغ آتا زوراکی ئٹ بیگواہی تا برخلاف توار بُڑز کننگ کن اوار اُن، ہرافتِہ ریاستی لشکر زوراکی ئٹ بیگواہی نا گواچی کرینے و ہرا دائسکان بیگواہ ءُ۔
سیف اللہ رودینی ئے، ہرا فرزانہ رودینی نا ایلم ءِ، 22 نومبر 2013 آ سوراب ان زوراکی ئٹ بیگواہی نا گواچی کننگا۔ او محکمہ پولیس ٹی ملازم اسک، اونا بیگواہی آن پد نہ بیرہ اودے انصاف تننگ متو، بلکن اونا تنخواہ ہم بند کننگا، ہراکہ اونا خاہوت نا اَسٹ انگا کھٹیا نا زریعت اسک۔
عظیم دوست ئے، ہرا رخسانہ دوست نا ایلم ءِ، 3 جولائی 2015 آ گوادر آن زوراکی ئٹ بیگواہی نا گواچی کننگا۔ او دائسکان بیگواہ ءِ و اونا شاعری تا زریعت ئٹ نن اونا یات ئے زندہ تخانن۔
چنگیز بلوچ ئے، ہراکہ حفظہ بلوچ نا ایلم ءِ، 11 جنوری 2014 آ خضدار آن زوراکی ئٹ بیگواہ کننگا۔ اونا خاہوت دا دڑد آن پُھر گواچن تون مون تسنے کہ او داسہ ہم بیگواہ ءِ، ہرانا سوب آن او اشتماعی ازیت ئٹی ءُ۔
امیر بخش بلوچ ئے، ہراکہ صدف امیر بلوچ نا باوہ ءِ، 4 اگست 2014 آ کلانچ آن زوراکی ئٹ بیگواہی نا گواچی کننگا۔ صدف تینا باوہ نا عکس ئے خنانے، ولے اگہ دا عکس آک متورہ گُڑا او تینا باوہ نا مون ئے استان دریکہ۔
ظہیر بلوچ ئے، ہرا ادیبہ بلوچ نا باوہ ءِ، 13 اپریل 2015 آن حب چوکی آن بیگواہی کننگا۔ اونا بیگواہی آن اونا خاہوت ئٹی بے جاراتی و دڑد ئنا اسہ چھول ئس ودی مسنے، اونا لمہ باوہ اینو ہم اونا کسر ئے ہریرہ۔
او پاریر کہ ننا دا کسہ غا تیٹ دڑد و بیوسی نا اَسہ دڑدیئو کسہ ئس ڈھکوک ءِ، سیف اللہ نا لُمہ باوہ تینا مار ئنا گِنار ئٹ دا جہاں آن رخصت کریر، ظہیر نا لُمہ ہم تینا مار ئنا گنار ئٹ دا جہان آن ہنا، ایلو زوراکی ئٹ بیگواہ کننگوک بندغ آتا لُمہ باوہ غاک پیری ٹی بے وسی و دڑد ئنا گواچی ءُ۔
خاہوت آک پاریر کہ نن اقوام متحدہ، ہیومن رائٹس واچ، ایمنسٹی انٹرنیشنل و ایلو بندغی حق آتا تنظیم آتیان خواست کینہ کہ او زوراکی نا بیگواہی تا دا بھلا ویل آ پٹ ءَ پول کیر، ننا بندغ آتے زوت آجو کننگ کن زہم تخوک گھام ہفِر و بندغی حق آتا لتاڑ تا برخلاف توار بُڑز کروکا تا مُخ تفی ئے کیر۔
او پاریر کہ ننا توار بِننگ مرے، و ننے انصاف تننگ مرے، نن اومیت کینہ کہ بندغی حق آتا تنظیم آک ننا دا خواست آ سوبری ئٹ غور کرور و زوت گام ہفور۔
او پاریر کہ نن کل اوار مرسا دا ظلم ئنا برخلاف جہد کین و انصاف ہلنگ کن تینا جہد ئے برجاء تخون۔
