بی ایس او نا مسکوہی چئیرمین و بی این ایم نا مسکوہی سیکریٹری جنرل رحیم بلوچ ایڈوکیٹ چاگڑدی حوالکاری میڈیا ایکس آ پوسٹ ئس کرسا پارے کہ 1 نومبر 2024 آ مستونگ ئٹی اسکول آ ہنوکا کیہی چُنا تِہ اسہ بمب تراک ئسیٹی کھسفنگ و ٹپی کننگ و راولپنڈی آن سکیورٹی ایجنسی تا دو آن نمل ئٹی خوانوک دہ بلوچ ورنا نا بیگواہی نا مذمت ئے کیوہ۔
بلوچ قومی تحریک آجوئی آن خلیس نا گواچی پاکستانی سکیورٹی ادارہ آک و اوفتا پراکسیک ہڑدے بلوچ زنک کشی ٹی ترندی ہتنگ ءُ۔ اوفتا خیال ءِ کہ ریاستی دہشتگردی و بیدادی ئٹ بلوچ تحریک آجوئی ئے توننگ کرور ولے ریاست نا دا سوچ دیہاڑ نا دھار آن چپ و رد تروک ءِ انتئے کہ دیہاڑ آن ثابت مریک کہ بھلا بھلا استعماری سلطنت آک ہم قومی تحریک آجوئی تا ہار ئٹ بوچ ئسے نا وڑ وہانو ہنانو۔
داسا ہنوکاتم ئنا پن ئنا عظیم استعماری سلطنت آتا عبرتی آ انجام ہی اسہ سبخ ئسے نا وڑ دیہاڑ نا پنّو آتیٹ سلیسنے تاکہ بندغی اوفتا بیم تروک انجام آن ہیل کرسا قوم آتا آجوئی، اواری ئٹ اسٹ ایلو نا بقاء نا اصول و تعاون نا کسر ئے ہلے، ولے پاکستان نا عاقبت خُڑک خنوک (نا اندیش) پنجابی اشرافیہ آن دنو ہچو اومیت تخوئی اف انتئے کہ خُڑک ہروک (کوتاہ نظر) حکمران اشرافیہ تینا ڈیہہ ئنا تدوکا ہفت دہک نا دیہاڑ آن ہچ ہیل کتو تو دیہاڑ یا ایلو قوم آتا آزموندہ غا تیان انت ہیل کرو۔
بلوچستان آ پاکستان نا زور ئنا کوزہ، اونا ظلم و استبداد و بلوچ زنک کشی نا پالیسی تیان گُٹ خلاصی کن غٹ بلوچ آتِہ تحریک آجوئی ٹی تینا کڑد ئے ادا کروئی مرو ہلہ آنہہ گُڑا ننا ساڑی و بروکا زنک ئے کوزہ گیر ریاستی ادارہ غاک اوفتا زبان، قومی و ثقافتی ٹیوار نا بنداو آ اندن بِدری روشت و زنک کشی نا گواچی کرسا کرور۔
