خوانندہ غاتا کنڈان سنگت خوانندہ تا وے آجو مننگ نا برخلاف ریلی کشنگا و برانز ریکارڈ کرفنگا۔
مُسہ سال مُست بلوچستان یونیورسٹی آن زورانسری ئٹ بیگواہی نا گواچی مروکا نوشکی نا ہندی سہیل بلوچ و فصیح بلوچ نا مرغنا بیگواہی و وے آجو مننگ نا برخلاف بلوچ اسٹوڈنٹس ایکشن کمیٹی نا کُنڈان کوئٹہ ٹی ریلی کشنگا و برانز کننگا۔
خوانند غاک بلوچستان یونیورسٹی کوئٹہ پریس کلب اِسکان ریلی و پریس کلب نا مون آ برانز کریر۔
کوئٹہ پریس کلب نا مون آ برانز تروکا تران کرسا پاریر کہ بلوچستان بیگواہ استان جوڑ مسُنے ہراڑے عدالت ہزار آ بندغ آتے بیدس قانود دزگیر کرسہ بیگواہ کننگانے و سال تیان بیدس ٹرائل آن بلوچ ورناک دزگیری بنجاہ تیٹ قیذ سگنگ ءُ۔
برانزی تا پاننگ اسک کہ بلوچستان ٹی زورانسری ئٹ بیگواہی تا گواچی مروکا خوانندہ، بزغر، استاد تیتون اوار ہر طبقہ آن تعلقداری تخوکا بندغ آک اوار و داخسکان کہ بندغ آتے اوفتا تعلیمی ادارہ تیان زورانسری ئٹ بیگواہی نا گواچی کننگانے۔
زورانسری ئٹ بیگواہی نا گواچی مروکا سہیل و فصیح بلوچ نا زورانسری نا بابت ئٹ برانزیک پاریر کہ مُسہ سال مُست تومکا خوانندہ غاتے اوفتا ہاسٹل جامعہ بلوچستان نا تہہ آن پاکستانی لشکر زورانسری ئٹ بیگواہی نا گواچی کرے ہراکہ مُسہ سال گدرینگ آن پد ہم پھاش کننگ متنو۔
کوئٹہ برانزی تیٹ خوانندہ و شاری تیتون آوار ایلو زورانسری ئٹ بیگواہی نا گواچی مروکا بندغ آتا خاہوت آک ہم اوار اسر و او تینا بندغ آتا آجوئی نا خواست کریر۔
برانزی تا ودیک پاننگ اسک کہ اَسہ وار ولدا بلوچستان ٹی زورانسری ئٹ بیگواہی تیٹ ودیکی ہتنگ مسُنے ہراڑے بلوچستان و ایلو ہند آتیان بلوچ خوانندہ غاتے زورانسری ئٹ بیگواہی نا گواچی کننگ ءُ، بیرا اکتوبر نا تُوو ئٹی 70 آن زیات بندغ زورانسری ئٹ بیگواہی نا گواچی مسُنو ہرافتیت بھازی خوانندہ تا اسک و اوفتے اوفتا ہاسٹل و اُرا تیان زورانسری ئٹ بیگواہ کننگانے۔
خوانندہ غاک خواست کریر کہ جہانی بندغی حق آتا ادارہ و پاکستان نا خوانندہ تنظیم آک دا زورانسری نا برخلاف بش مریسہ ریاست آن سوج کیر و بلوچ خوانندہ تا آجوئی ٹی تینا کڑد ئے ادا کیر۔
