زورانسری بیگواہی تا برخلاف برجاء برانزی کیمپ ئے 5622 دے مس، اواری نا درشانی کن چاغی آن بلال نوتیزئی، مہیم خان شمس سمالانی، دودا خان، فرزانہ ایڈوکیٹ کیمپ آ بسُر۔
وی بی ایم پی نا وائس چیئرمین ماما قدیر بلوچ پارے کہ کوزہ گیر لشکر تیبہ بلوچستان ٹی تینا دہشت گرد کاروائی تِہ تیزکرینے، خضدار نا ہند نال، گریشہ، بولان،سبی تون اوار بلوچستان نا جتاء ہند آتیٹ لشکر ہندی بندغ آتون اوار مرسا کراچی ٹی بلوچ ورنا تِہ زورانسری بیگواہی نا لڑ ئے برجاء تخانے۔
او پارے کہ کوئٹہ نا زرغون، ولی تنگی و ہیب کھیب ئنا علاقہ آ تیٹ آپریشن برجاء ءِ و ارا چُنک سن مار ہم تدوکا دے زورانسری ئٹ بیگواہ کننگ آن پدا نا درستو جاگہ ئسے آ دننگانے۔
ماما قدیر بلوچ پارے کہ پاکستان جہانی قانود و خاص بندغی حق آتا کتاڑ کن انتہا کرینے ولے جہانی قانود و بندغی حق آتا دعویدار تا بے حسی دائسکان برجاء ءِ، ہراڑان بلوچ پر ایمن جہد و بندغی حق و جہانی قانود آ تا دعوی آک بیرہ ہیت اسکان سلیسنو۔
اونا پاننگ اس کہ پاکستانی ریاست نا جبر و اقوام متحدہ نا بے حسی بندغی حق آتا تصور ئے بلوچستان ٹی بے معنی ثابت کرینے، بلوچستان گواچن ئٹ اسہ بندغی حق و بیدس خطہ نا دروشم اختیار کرینے تیبہ بلوچستان ئٹی پاکستانی لشکر نا کاروائیک برجاء ءُ، بلوچستان نا جتاء ہند آتیٹ دہشتگردانہ کاروائی و بلوچ ورنا تِہ بیگواہ کننگ ئٹی ودکی ہتنگانے۔
ماما قدیر بلوچ پارے کہ زرغون ولی تنگی، بولان، سبی لشکر نا گھیرہ ٹی او بلوچستان نا حالیت جہانی ادارہ اقوام متحدہ و بندغی حق آتا ادارہ غا تا دعوہ اعلامیہ و جہانی قانود آ تا سوج ئسے نا نشان ءِ، بندغی حق آ تا چارٹر نا منظوری و اوکان پدا بندغی حق آتا بابت ئٹ کیہی اعلامیہ و قرارداد تیان بیدس تُدوکا 6 دہائی تیان بلوچ زنک کشی فرزند آتِہ پھاش دے ئٹ بیگواہ کننگ اوفتا شہیدی تِہ توننگ نا پن ئے ہلپک۔
