نوشت: ایس کے بلوچ
براہوئی مٹ: بلسم بلوچ
زرمبش نوشتانک
پِتی آ کسر تا مسافر ننے الا ہنا، او ننا یام ئٹ خرین آ راستی (حقیقت) تیان سرپند، پھاش پاریکہ” دا نوبادیاتی نظام نا روتہ غا تِہ کھشکوئی ءِ و گیشتر ورناک بےچکار مرسا آخر اراتم اسکان تینتو سر مہ سر مرور!”
او پاریکہ کہ "لس وڑ ئٹ نزور و بیوس آ بندغ آک ظالم نا برخلاف شکایست کیرہ تو اونا ہمسایہ و سیال آک پارہ کہ چُپ کبو۔ اندا سوب آن ہرا خَنک تیر ئتون مون تننگ آ بریرہ اوفتِہ او سٹِفرہ۔ دا ورنا تِہ جیرت ئے الوئی اف بلکہ تلار مرسا دشمن نا برخلاف سلوئی ءِ و مون تروئی ءِ۔”
مارشت ہم مفک کہ او وختس یکہ سیاسی پِڑ آ انداخس گچینو کڑد ئسے نا گودی اسک کہ اونا رند ئٹ کُل مسنک تینٹ سرکل تیٹ اوار مسرہ۔ او ہم کمال اس!
وختس یونیورسٹی نا کینٹین ئٹی برسا تو وختس لیبریری ٹی برسا ننتو ادبی سرحال تیا بحث کریکہ۔ ننا نیام ئٹ تران سیاسی و ادبی مسکہ۔ او شعبہ پولیٹکل سائنس ئٹی خواننگ اس و ای ادب نا چنکو خوانوک ئس، اوڑتون ای دے کہی پولیٹکل تھاٹ و بلوچ راج ئنا بارث ئٹ ہیت کریٹہ۔
ہرکس حمیدہ ئے خُڑک آن خنوک ءِ او چائک کہ حمیدہ ارا چِر ئٹ سلوک اس، او حق ئنا کسر نا مسافر اس۔۔۔۔ بھاز آ سنگت آک اعتراز کریرہ کہ حمیدہ سیاسی بندغ ئس اف بلکہ جنگی مسڑ ئس ءِ انتئے کہ او تینا ایلم نا عکس ئے وار وار آ فیسبک آ اپلوڈ کیک، دا سیاسی پِڑ آ قابل قبول اف کہ کس پھاش تینا شہید مروک ایلم نا عکس ئے دا وڑ اپلوڈ کے! او ورنا تا ہم ردی اف انتئے کہ ایڑ تتون دا زیبا غا سیالی اوفتا خن ئٹ بروف!
مابت نا درشانی تو پھاش مریک کہ ہمر ہانی و شئے مرید نا اس، للہ و گراناز و رضا جہانگیر و وطن نا اس!
اندن کہ جبران پائک "مابت کبو، پھاش کبو، بیدس خلیس آن کبو ولے مابت کننگ تون اوار اسہ دعا ئس کننگ استان دپیرے، و پرکھبو کہ دا ہم نما حق ءِ۔”
بھازی آن اندا نقطہء نظر ئٹ لیلی خالد پاریسس: "زالبول اسہ جنگول، آجوئی دوست و سیاسی کاریم کروک ئس مننگ کیک، او مابت ئٹ تمنگ کیک و اوڑتون مابت مننگ کیک، او برام ہم کننگ کیک، چُنا ودی کننگ کیک، لمّہ ئس ہم مننگ کیک۔” دا ہمو نیاڑی اسک ہرا اسہ لمّہ ئس ہم اسک، اسہ جنگول ئس ہم اسک، اسہ سیاسی نیاڑیس ہم اسک ہرا نا مابت ڈیہہ کن پاک و اسُل ساف دیر ئنا وڑ اسک! ڈغار و نرینہ نا نیام ئنا سیالی ئے ہانی و شئے مرید نا نیام ئنا پاک مابت تون تشبیہ تننگک ولے داسا دا مابت ئے انت پن ایتو ہرا نا درشانی ئے اسہ مسڑ ئس تینا گل زمین کن کیک؟
ننا رہا تنقید نا اسہ رواج ئس ارے۔ شاعری، سیاست، قانود، فلسفہ، ادب، بلکہ ہمرو شعبہ ئس مرے، اوٹی پوسکنی، پوسکنو مواد، پوسکنو پٹ ءَ پول، و پوسکنو گنجائش ودی کننگ نا ہچو کوشست ئسے نا اُست بڈی کننگپک بلکہ اوڑا تنقید کننگک۔
وختس حمیدہ ئے ہبو کہ سیاست نا پِڑ آ بھاز کم دنو نیاڑی ارے ہرافتِہ ظلم آن خار بریک و ڈیہہ تون مہر کیرہ۔ دا حمیدہ اسک کہ راج تون ہم پھاش مہر کریکہ۔
دا ظلم ئنا لِچغ ئٹی غرک مروک نن ہڑدے پوسکنو کسہ غا تا بنجاہ جوڑ مرینہ، کس انڈیا نا ایجنٹ آتا پنٹ توار کرسا ننے ہرفِک، کس ڈغار دشمن و دہشتگرد نا تھپہ خلِسہ ساہ ئے ہلیک۔
کس خَنو کہ چپی ئٹ وے ٹُبنگ نا سزا ئے دے ءَ نن کاٹنگ اُن نن۔
دہونی ٹی اسہ باشعور بندغ ئس ہرا پُرجوش راجی سوال ئے مِلی ٹی تخِسہ پِڑ آ دھڑنگک اودے زو ئس چُپ کرفنگک، چُپ مفک تو خلنگک، خلنگپک تو اودے ٹوئٹر و فیسبک اکاؤنٹ آ پنجابی کھرینگ ایترہ۔
ولے کس تحریک آن مُر مفک، مرے تو او تینا مثیل تینٹ ءِ۔۔۔!
مابعد نوبادیاتی حاشیہ زدہ دود ربیدہ غا تا قلم دار آتا قلم آن نما کسہ غاک اسہ اندنو آئینہ خانہ ئسے اُر ہراڑے قاری و راقم تومکا تِہ اول ہوغنگ ہلو انتئے کہ نی انقلابی اسوس! و چی گویرا پائک کہ، جہان نا ہر انقلاب نیاڑی آن ویتہ وے پورو ءِ۔ نی ہمو نیاڑی اُس ہرا انقلابی اس، اسہ تلار ئسے نا وڑ خننگاکہ، اِرا ہزار بیست ئنا وختا بساک نا سنگت آتتون سلوک انداخس جیرت و حوصلہ نا درشانی کننگ اس کہ اسُل استان دروئی اف، نا جیرت نا بارث ئٹ۔۔۔!
او اسٹ انگا سیاسی مسڑ اس ہرا نا رہا نن تینٹ ہم جارات و اطمینان محسوس کرینہ کہ دائسکان نن بشخ مروک افن انتئے کہ اسہ مسڑ ئس ننتو اوار ءِ۔
بھازی آن اندا پاس ئنا اندازہ لبنان نا خلیل جبران ئے اس کہ او پارے "ہمر خوشبو آن ویتہ پُھل مریک، بخت آن ویتہ زیبا غا زالبول مریک۔” دا وختا بخت ہم اوڑتون اوار سلنگ الو ولے اندا مسڑ سیبو مرسا ننے حوصلہ تسکہ کہ ای تو اوار سلوک اُٹ۔
او اسہ اندنو خلق ئسیٹی ودی مسس ہراڑے شئے مرید ودی مسس۔ اسہ اندنو شئے مرید ئس ہرا نا ہانی اندا ڈغار ءِ، او دا گل زمین کن ساندہ زندہ سلیس۔ اندا قبرستان ئٹ حمیدہ تینا ایلم نا رہا ہنِسہ دوارہ اونا کلک آتیان دروت ہلِسہ رضا جھانگیر و میر جان تون ننا دڑد آن پُھر آ کسہ غا تِہ بنفو!
