بلوچ یکجہتی کمیٹی نا مہم ”چپی ئے پرغنگ: زوراکی نا بیگواہی تا برخلاف بش مننگ“ نا سرحال ئٹ دالبندین ئٹ برانز کننگا۔
بلوچ یکجہتی کمیٹی نا کنڈ آن دالبندین ئٹ بیگواہ کننگوک بندغ آتا خاہوت و شاری تا پارہ غان اسہ برانزی ریلی ئس کشنگا ہرا عرب مسجد آن بناء مرسا شار ئنا بنجائی کسر ئٹ برسا دالبندین پریس کلب نا مونا سر مس۔
برانزیک دالبندین پریس کلب نا مونا برانز کریر۔ ریلی ٹی بیگواہ کننگوک بندغ آتا خاہوت آک ہم اوار اسر۔
ریلی ٹی بیگواہ کننگوک غلام اللہ نا ایلم و عامر بلوچ تران کرسا پاریر کہ بیگواہ غا بندغ آ تِہ دمدستی آجو کننگہ نن عدالت آتِہ منینہ ولے نم اوفتا شرف ئے لتاڑیرے۔ دا وخت بلوچستان ئٹ ظلم و تادیک برجاء ءُ، بیگواہ کننگوک بندغ آتا خاہوت آک کسر تیا در پہ در ءُ ولے ننے ہچو انصاف ئس رسینگ ئٹی اف و بلوچستان آن گیشتر ورناک بیگواہ مننگ ءُ۔
خاہوت آک خواست کریر کہ غٹ بیگواہ کننگوک بندغ آ تِہ پھاش کرسا عدالت آتیٹ ہتنگہ اگہ اوفک ڈوہ ئس کرینو گڑا اوفتے سفائی نا وارخواہی تننگہ۔
بلوچ یکجہتی کمیٹی نا مہم ”چپی ئے پرغنگ: زوراکی نا بیگواہی تا برخلاف بش مننگ“ نا سرحال ئٹ بلوچستان نا جتا علاقہ غا تیٹ برانز آتا لڑ برجاء ءِ ہراڑے داکان مہالو کراچی، حب چوکی، خضدار، تربت، پنجگور، خاران، کوئٹہ، نوشکے و اینو دالبندین ئٹ برانز کننگا۔
