بلوچ نیشنل مومونٹ نا مسکوہی چیئر مین و بلوچ سروک خلیل بلوچ چاگڑدی حوالکاری میڈیا ایکس آ تینا اسہ بیان ئسیٹی پارینے کہ بلوچ ورلڈ جسٹس پراجیکٹ نا دا زوت ئنا رپورٹ آتا رد ئٹ پاکستان قانود، انصاف و حکومت کننگ نا بارث ئٹ جہان نا مسٹمیکو بدحال ڈیہہ ءِ ہرا نا نمبر 142 ڈیہہ ئٹی 140 آٹے۔ دا فریشان کروک گواچن ہمو سرمایہ کار آتیکن اسہ خبڑداری ئس ءِ ہرا پاکستان ئے اسہ قابل عمل وارخواہی ئسے نا وڑ ہُریرہ۔
او پارے کہ گواچن دادے کہ ہرکس پاکستان ئٹی سرمایہ کاری کیک او تینا مڈی تِہ اسہ باء تروک ریاست ئسیٹی خطرہ ٹی شاغک۔ ہراٹی حل طلب راجی سوج و تہہ ئنا تضاد، بھلو کچ ئسیٹی عدم استحکام و بے باوری نا حالیت آتا پلوریڑ ئٹی ءِ۔
او پاریر کہ پاکستان ئٹی امن و ایمنی نا ویل بیرہ ڈوہداری و ہڑدیئی چنکا چنکا تدینی تا بھرم اف۔ دا اسہ ہرے نا ویل ئس ءِ ہرا نا روتہ غاک نوآبادیاتی راج آتا زوراکی و اوفتا بنداوی حق آتیان نمن مننگ ئٹ تفوک ءُ۔بلوچستان ئٹی آجوئی نا تحریک برجاء ءِ و پاکستان دادے ایسر کننگ نا نہار کون ءُ کوشست کننگ ءِ۔ اندن، پاکستان نا پن ئنا فیڈریشن نا غٹ علاقہ، ویتہ پنجاب آن، ہراتم او جند خواجہی نا خواست کیرہ تو اوفتِہ زوراکی تون مون تروئی تمک۔ پاکستان راجی حق کن ہمو کوشست آتِہ توننگ کن زوراکی کیک، ہرڑان اسہ وڑ برجاؤ جیڑہ ئسے نا کیفیت ئس ودی مننگ ءِ۔ منکر مننگ نا کوشست آتیٹ، پاکستان بھلو وخت ئسے آن دا راجی جیڑہ غا تِہ بیرہ امن و ایمنی نا ویل جوڑانے۔
بلوچ سروک پارے کہ رپورٹ ئٹی السی و لشکر داری انصاف، بنداوی حق، حکومت کننگ ئٹ بدعنوانی ٹی پاکستان نا بدحال کارکردگی ئے ودیک پھاش کننگانے۔ دا اسہ ذمہ وار ڈیہہ ئسے نا مئیار آ پورو تمنگ ئٹ ریاست نا بیسوبی تِہ پھاش کیک، ہرادے عسکریت پسند اسٹیبلشمنٹ اسکان توننگ مسنے۔ ریاست نا پام بیرہ استحصال و راجی تحریک آتِہ توننگ آٹے۔ سرمایہ کار آتیان خواست ءِ کہ او نہ بیرہ پاکستان نا سیاسی و سلامتی نا حالیت بلکہ مظلوم آ راج و اوفتا سیم تا تہٹی اوفتا راجی تحریک آتیا ہم غور کیر۔ پاکستان ئٹی سرمایہ کاری زہم تخوک وڑ ئٹ جند خواجہی نا جہد کروکا تیکن ہمو راج آتا برخلاف زوراکی و بیدادی تِہ زیات کیک۔
او پارے کہ پاکستان ئٹی امن و ایمنی نا کاختی نہ وختی ءِ، نہ دھڑ بندی، نہ مصنوعی، بلکہ دا نا روتہ غاک کڑُمب راجی تضاد آتیان ودی مریرہ ہرافتا ہچو حل اف۔ دا گواچن تا روشنائی ٹی پاکستان ئٹی گواچنی امن دوئی مننگ منکن خننگپک، ہرا دادے ہچو سوبر سرمایہ کاری کن اسہ خطرناک بنداو ئس جوڑ کیک۔
