خاران ئٹ پولیس نا کنڈ آن تولوک برانز کننگ و کسر تہ بند کننگ نا برخلاف بیگواہ غا بندغ آتا خاہوت آتیا ایف آئی آر کننگانے۔
حوال تا رِدئٹ خاران پولیس درو خاران ریڈ زون آ زوراکی ئٹ بیگواہ کننگوک عبیداللہ و ایلو بیگواہ غا بندغ آتیکن خاہوت آتا کنڈ آن تولوک برانز کننگ آ مقدمہ کرینے۔
خاران پولیس نا پاننگ ءِ کہ برانز کروکاک خاران ریڈ زون شال ئنا کسر آ تولوک برانز کرسا کسر ئے بند کرینو، پولیس عزیز اکرم، آصف نور، ظفر و پین دہ بندغ آ ایف آئی آر کرینے۔
برانز کروکا تیا مقدمہ کننگ آ بلوچ یکجہتی کمیٹی پارینے کہ ریاست بلوچستان ئٹی اسہ وڑ زوراکی کننگ ئٹی ءِ، بلوچستان نا اُلس ہفتاد سال آن دا زوراکی تا گْواچی ءِ۔
او پارینے کہ انصاف کن امن ئٹ جہد ہخس گیشتر مریک، ریاست دا جہد ئے توننگ کن جہدکار تا پِن تہ ‘فورتھ شیڈول’ ئٹی شاغک یا اوفتیا دروغ ئنا ایف آئی آر کرسا اوفتہ سیاسی جہد آن مُر کننگ خْواہیک۔
بلوچ یکجہتی کمیٹی تینا بیان ئٹی پارینے کہ "چُپی ئے پرغنگ: زوراکی نا بیگواہی تا برخلاف بش مننگ” نا سر حال ئٹ ننا برانزی لڑ تا رِدئٹ درو خاران ئٹی اسہ برانز ئس کننگا، ہرا ٹی بیگواہ غا بندغ آتا آجوئی نا خْواست کنّنگا۔ دا نا ایوِز ئٹی ریاست برانز کروکا تیا ایف آئی آر کرسہ بندغی حق آتا و انصاف نا درست آ خْواست آتہ شیف کننگ نا کوشست کرے۔ دا پوسکنو چم ئس افک محکوم آتا توار ئے شیف کننگ کن ریاست بھلو وخت ئسے آن ہندن کننگ ئٹی ءِ۔
ایلو نیمہ غا خاران ریڈ زون آ تولوک برانز کروکا بیگواہ غا بندغ آتا خاہوت آک پریس کانفرنس کرسا پاریر کہ نن خاران انتظامیہ ئے پین اِرا دے ئنا وخت تینہ کہ او عبیداللہ تگاپی نا آجوئی کن سوبری شان ایتہ و ہرافتا مقدمہ کننگانے اوفتہ ایسر کننگہ۔ اگہ اِرا دے اسکان عبیداللہ تگاپی (باوہ نا پِن حاجی برکت) پھاش کننگ متو و مقدمہ آک چھٹّفنگتوس تو نن سختو گام ہفّون۔
