پنجگور ئٹی بلوچ یکجہتی کمیٹی نا کنڈ آن اڈ ہلوک برانز ئٹ اوار بندغ آتِہ بیم ئنا گواچی کرسا ورناس زورانسری بیگواہ کننگا۔
بلوچ یکجہتی کمیٹی نا آرگنائزر ڈاکٹر ماہ رنگ بلوچ تینا چاگڑدی حوالکاری میڈیا غا اکاؤنٹ آ پوسٹ کرسا پارے کہ بلوچ یکجہتی کمیٹی نا کنڈ آن تیبہ بلوچستان ئٹی برجاء زوراکی نا بیگواہی تا برخلاف تحریک ئٹی اینو پنجگور ئٹی برانزی ریلی کشنگا و برانز ریکارڈ کننگا۔
ماہ رنگ بلوچ نا رد ئٹ ہموتم ریلی ٹی اوار مروکا بندغ آتِہ ریاستی مخ تفی ٹی چلوکا ڈیتھ اسکواڈ و پاکستانی ایجنسی تا کارندہ غاک بیم ئنا گواچی کریر و حسیب پنیئو ورنا ئسے کل ئنا مون آ زورانسری بیگواہی نا گواچی کریر۔
ماہ رنگ بلوچ پارے کہ پن ئنا جمہوریت نا دعوی دارک بلوچستان ئٹی برجاء تینا بدمعاش لشکر نا غندہ گردی نا ڈوہ ئٹ اوار ءِ۔
یات مرے کہ ہندا دے تیٹ بلوچستان تون اوار کراچی و ایلو ہند آ تیٹ زورانسری بیگواہی تیٹ ودکی مسنے ہراکہ ہندا تو اکتوبر ئٹی 80 آن زیات زورانسری بیگواہی تا تدینی تا رپورٹ مونا بسنے۔
بلوچ یکجہتی کمیٹی دا زورانسری بیگواہی تا برخلاف تیبہ بلوچستان ئٹی برانز نا پڑو تسنے۔ داکان مہالو کراچی، حب چوکی، خضدار و تربت ئٹی برانز کننگانے و ریلی کشنگانے۔
کراچی برانز نا وختا سندھ پولیس کیہی بلوچ برانزی تیا بیدادی کرسا دزگیر کریسس، حب چوکی ٹی انتظامیہ و پولیس نا کنڈ آن لسبیلہ پریس کلب آ ہڑاند شاغِسہ بند کریسس، تربت و خضدار ئٹی برانز نا وختا تومکا شار تیٹ موبائل سروس آک بند مسوسر۔
