اقوام متحدہ نا شاری و سیاسی حق آتا کمیٹی پاکستان ئٹی شاری و سیاسی حق آتا حالیت نا جاچ ئے ہلّنگ نا وختا بلوچستان ئٹی زوراکی نا بیگواہی تا جیڑہ ئے ہفے۔
اقوام متحدہ نا بندغی حق آتا کمیٹی (CCPR) نا یک سد و چِھل و دو ئمیکو مجلس درو سوئٹزرلینڈ نا شار جنیوا ٹی مس، ہراڑے شاری و سیاسی حق آتا جہانی معاہدہ نا رد ئٹ جوڑ مروکا کمیٹی پاکستان نا بندغی حق آتا ریکارڈ نا جاچ ئے ہلک و پاکستانی ڈل آن سوج کرے۔
پاکستان ٹی بندغی حق آتا لتاڑ آ فرانس نا قانود چاؤک و کمیٹی نا باسک ہیلین ٹگروڈجا بلوچستان ئٹی زوراکی نا بیگواہی تا تینا رپورٹ ئے مونا ہیس و پاکستانی نمائندہ غا تیان سوج کرے۔ کمیٹی نا باسک آتا رد ئٹ بلوچستان ئٹی زوراکی نا بیگواہی تا تدینی تیٹ ودکی مسنے۔
ٹگروڈجا پاکستان ئٹی بندغی حق آتا لتاڑ نا ودکی آ افسوس کرے و خاص وڑئٹ بلوچستان ئٹی زوراکی نا بیگواہی تا ودّوکا تدینی تا ہیت ئے کرے، ہراڑے او پارے کہ 2017ء ٹی پاکستان نا گُڈیکو جاچ ئے ہلّنگ آن پد اوفتیٹ پین گیشتری بسّنے۔
زوراکی نا بیگواہی تا بارت ئٹ اقوام متحدہ نا ورکنگ گروپ و ایلو تنظیم آتا حساب ئے ترسہ ٹگروڈجا پارے کہ پاکستان ئٹی 2004 آن 2024 اسکا زوراکی نا بیگواہی نا 7000 آن گیشتر تدینی مونا بسنے، ہرافتیٹ کیہیک ریاستی انسداد دہشت گردی نا پالیسی تون گھنڈوک ءُ۔
ٹگروڈجا نا پاننگ اس کہ زوراکی ئٹ بیگواہ کننگوک سیاسی جہدکار، صحافی، خوانندہ، بندغی حق آتا رکھوک آک و خاص وڑئٹ بلوچ مخلوق ئے ٹِک کننگک۔ اوکان ویتہ احمدی فرقہ و پشتون آتِہ ہم زوراکی ئٹ بیگواہ کننگک۔
او بلوچستان ئٹی ایمنی ئٹ سیاسی جہدکروکاتا برخلاف ریاستی زوراکی آ افسوس کرے ہرا زوراکی نا بیگواہی و بےقانودی بندغ آتہ کھسفنگ نا برخلاف مریرہ۔ سمی بلوچ ئے اقوام متحدہ نا دیوان ئٹی بشخ ہلّنگ آن توننگ نا بارو ئٹ سوج کننگا۔
ٹگروڈجا زوراکی نا بیگواہی تہ ڈوہ ئس سرپند مننگ کن پاکستان نا قانود جوڑ کننگ نا کوشست آ سوج کرے و زوراکی نا بیگواہی تا کیس آتا آزاتی ئٹ پٹ ءَ پول نا خواست کرے۔
او زوراکی نا بیگواہی تا پٹ ءَ پول کن جوڑ مروکا ساڑی آ کمیشن نا آزاتی نا کمتی آ نغد کاری کرسہ پارے کہ دا کمیشن نا کڑد آ پاکستان نا تینا سپریم کورٹ سوج کرینے۔ او پیدَوار کرے کہ دا مسئلہ آتہ چُھٹفنگ کن پاکستان ہچّو قانودی بدلی ئس ہتّنے۔
او پاکستان آ زور شاغا کہ او زوراکی نا بیگواہی تا کیس آتا شابیت و آزاتی ئٹ پٹ ءَ پول ئے کھ و بیگواہ کننگوک بندغ آتا خاہوت آتہ انصاف و کمک تے۔
کمیٹی نا باسک آتِہ پاکستانی ڈل ئنا ورندی تیا اُست جَمی متو، وخت ئنا کمتی نا سوَب آن پاکستانی ڈل ایلو دے جنیوا ٹی اقوام متحدہ نا کمیٹی نا مُستی سوج آتیا ورندی نا پارے۔
