زورانسری بیگواہی تا برخلاف برجاء برانزی کیمپ ئے 5609 دے مس۔ اواری نا درشانی کن بروکا تیٹ مستونگ نا سیاسی و چاگڑدی باسک محمد عظیم بلوچ، نور محمد بلوچ دستگیر بلوچ تون اوار ایلو نرینہ و زالبولک اوار اسُر۔
وائس فار بلوچ مسنگ پرسنز نا وائس چیئرمین ماما قدیر بلوچ پارے کہ کیہی سال آن بلوچستان ئٹی برجاء بلوچ زنک کشی نا شدت ئٹی ریاست دے پہ دے ودکی کننگ ءِ۔ بلوچ آتِہ زورانسری بیگواہ کرِسہ اوفتِہ بیدادی نا گواچی کرِسہ شہید کرِسہ اوفتا جشوک جون تِہ خَسنگ نا وڑ انگا گندہ و بے بندغی کاریمک برجاء اسر کہ ریاست پاکستان دا بلوچ زنک کش پالیسی نا شدت ئٹی ودکی کرِسہ لس بلوچ شاری تا اُراتیٹ بمباری کرِسہ چادر و چھار دیوالی نا شرف ئے لتاڑِسہ اوفتِہ لُٹنگ و پدا ہُشنگ نا پوسکنو لڑ ئسے نا بناء ئے کرینے۔
او پارے کہ ریاست نا کُنڈ آن بلوچ زنک کشی نا اَسہ تازہ ؤ مثیل ئسے نا ننے حوال رسینگانے کہ کوہلو کاہان آپریشن ئٹی نُہہ بندغ شہید کننگانو۔ جون تِہ ڈی ایچ کیو اسپتال آ دننگانے، اسپتال ئٹی لشکر نا سخت پھیرا ءِ اوفتِہ ہُننگ نا موکل تننگ افس، ہرانا سوب آن جون تا گند تیبہ ہند ئٹی تالان ءِ۔ مَننگ کیک کہ او بیگواہ غا بندغ آتا جونک مریر۔ دا وخت بلوچستان ئٹی اَسہ بھلو بندغی المیہ ئس ودی مسُنے۔
ماما قدیر بلوچ پارے کہ ریاستی لشکر نا کنڈ آن تُدوکا اِرا تُوو ئٹی پین زیات شدت ئٹ کاروائی دا اومیت ئے سوگو کیک کہ داسا ریاست پاکستان بلوچستان ئٹی ہچو جہانی قانود آتِہ خاطر ئٹ ہتپننگ نا فیصلہ کرینے، وبلوچ پر ایمن جُہد ئنا مون ئے توننگ کن مُست ئنا کوزہ گیر آتا وڑ سرغ آتا ماڑی سلیفنگ آن پدی مفرو۔
آواران جھاؤ ٹی 5 آن زیات بلوچ شہید کرِسہ نہ بیرہ درزن آن زیات بلوچ زورانسری بیگواہ کرسہ زاندان آتیٹ دننگانو، بلکن آبادی تا آبادی تِہ ہُشانو۔ مشکے ٹی ہم ہڑدے نا بالی و زمینی آپریشن تیٹ بندغ آتِہ جانی و مالی نسخان رسیفینو، و داڑتون اوار تُدوکا اسہ ہفتہ آن قلات نا ہیب کھیب ئنا خلق آ تیٹ تینا لشکر نا زریعہ ئٹ گھیرہ کرسہ اُلسی آبادی نا راشن و دیر ئنا کُل زریعہ تِہ بند کرینو۔
