کراچی: سندھی خوانندہ تنظیم “جیئے سندھ اسٹوڈنٹس فیڈریشن” نا ترجمان نا رد ئٹ 14 تُو مُست سندھ یونیورسٹی حیدرآباد آن پاکستانی لشکر نا دو آن زوراکی ئٹ بیگواہ کننگوک سندھی خوانندہ و تنظیم نا باسک ساجن ملوکانی ئے پنجاب پولیس دروغ ئنا مونتس ئٹ کھسفینے۔
او پارے کہ پنجابی پولیس نا دروغ نا مونتس ئٹ کھسفنگوک سندھی خوانندہ نا خاہوت نا رد ئٹ ساجن ملوکھانی ئے چھانڑدہ تُو مُست 1 ستمبر 2024 آ سندھ یونیورسٹی حیدرآباد نا متکنا کیمپس آن واپس اُراغا بننگ نا وختا پاکستانی لشکر زوراکی ئٹ بیگواہ کریسس۔
ترجمان نا رد ئٹ ساجن ملوکانی سندھ ئنا خوانندہ تنظیم جیئے سندھ اسٹوڈنٹس فیڈریشن، سندھ یونیورسٹی نا باسک ئس اس۔ اونا آجوئی کن سندھ ئنا جتا سیاسی و چاگڑدی تنظیم و مسنگ پرسنز فورم ہم کیہی وار برانز کریسس و ساجن ملوکانی نا لمّہ اونا زوراکی نا بیگواہی نا رد ئٹ سندھ ہائی کورٹ حیدرآباد ئٹی پٹیشن ئس ہم کریسس۔
وائس فار مسنگ پرسنز آف سندھ و ایلو تلہ غاک زوراکی ئٹ بیگواہ کننگوک ساجن ملوکھانی نا بارث ئٹ کیہی وار پریس کانفرنس کریسر و خلیس نا درشانی کریسر کہ سی ٹی ڈی حیدرآباد ساجن ملوکانی تون اوار اِرا پین زوراکی ئٹ بیگواہ کننگوک باسک شوکت ملوکانی و نعیم ملوکانی نا دروغ ئنا مونتس آتیٹ دزگیری ئے پھاش کننگ نا وختا ساجن ملوکانی آ دوبہ خلکسس۔
وائس فار مسنگ پرسنز آف سندھ خلیس نا درشانی کریسس کہ پاکستانی لشکر ساجن ملوکانی ئے اِرا راج دوست سندھی کارکن نا وڑ دروغ ئنا پولیس مونتس ئٹ کھسفو و دا وختا سندھ ئنا کُل سیاسی، چاگڑدی و بندغی حق آتا تنظم آک اقوام متحدہ و ایمنسٹی انٹرنیشنل تون اوار غٹ جہانی ادارہ غا تیان ساجن ملوکانی نا زند ئنا بارث ئٹ خلیس آ نوٹیس ہلنگ نا خواست کریسس۔
سندھی خوانندہ تنظیم جیئے سندھ اسٹوڈنٹس فیڈریشن نا رد ئٹ ساجن ملوکانی ئے پنجاب نا رحیم یار خان پولیس 6 اکتوبر 2024 آ رحیم یار خان نا کچے نا علاقہ ٹی دروغ ئنا مونتس ئٹ کھسفِسہ اودے داڑیل ئس پارینے۔
