“عدالت آتیٹ تولوک جج آک، ہرافتِہ ڈیہہ ئنا شاری تِہ انصاف تروئی اس او فوجی تا ترجمان جوڑ مسنو”، ڈاکٹر ماہ رنگ پارے۔
بلوچ یکجہتی کمیٹی نا بنجائی آرگنائزر و راہشون ڈاکٹر مارہ رنگ بلوچ و وائس فار بلوچ مسنگ پرسنز نا سروک سمی دین بلوچ کراچی بار ایسوسی ایشن نا وکیل آتا مجلس ئٹ اوار مسر، ہراڑے کوالخواہ تا کنڈ آن مجلس نا وختا حال ئنا بجلی بند کننگا۔
مجلس ئٹ ہڑاند ودی کننگ آ وکیل آک ڈاکٹر ماہ رنگ بلوچ و سمی دین نا حق ئٹی نعرہ خلکر۔
ولدا ڈاکٹر ماہ رنگ بلوچ و سمی دین بلوچ ئے وکیل آک اسٹیج آ خواہسر ہراڑے وکلاء کنونشن تون ہیت کرسا ڈاکٹر ماہ رنگ بلوچ پارے کہ اینو دا عدالت آتیٹ تولوک جج آک، ہرافتِہ ڈیہہ ئنا شاری تِہ انصاف تروئی اس او فوجی تا ترجمان جوڑ مسنو۔
ماہ رنگ بلوچ پارے کہ ریاست نا زوراکی و تادیک بلوچستان ئٹی پھاش مسنو، ریاست چائے بلوچستان ئٹی اخس بلین ڈالر خڑچ کے او بلوچستان نا کوچہ غا تیٹ وہفوکا دتر تِہ ڈھکنگ کپک۔
ڈاکٹر ماہ رنگ بلوچ عدالتی جج آتیا نغد کاری کرسا پارے کہ اینو او بلوچ لمّہ غاک، ہرافتا چُنا تِہ ریاستی ادارہ غاک جشوک جون تا دروشم ئٹ خسِرہ او نُمے دا پاپسہ کہ نُم اوفتِہ انصاف ایتبو، یا اوفتا چُنا تا خونی تِہ سزا ایتبو، او بیرہ دا خواست کیرہ کہ ننا چُنا تا چاہنداری ئے کبو کہ دا ننا چُناکو یا آخہ۔
ماہ رنگ بلوچ پارے کہ دا المیہ ئس ءِ انصاف تننگ کن تولوکا جج آتِہ ٹَک خلوئی ءِ کہ اوفتا اوقات انداخس تمانے کہ او لمّہ غاک اینو اوفتیان انصاف خواہپسہ بلوچ لمّہ غاک تینا انصاف ئے تینٹ کرور۔
او پارے کہ بلوچ نیاڑیک بلوچستان نا ہمو جنگ ئے کننگ ءُ ہرا بروکا وخت ئٹ اسہ بھلو تحریک ئس جوڑ مرسا مونا برو۔
اندن ماہ رنگ بلوچ نا پاننگ اس کہ پانزدہ سال آن بلوچ، سندھی، پشتون و ہر ہمو لس شاری تا لمّہ غاک برسا دا جج آتا مونا تینا چُنا تیکن فریاد کیرہ کہ ننا چُنا تِہ ہتبو، ہمو فائلک ودسہ کارہ ولے دا جج آتا ضمیر نا بوجھ ودپک۔
