حوال تا رد ئٹ پاکستانی لشکر پنجگور نا جہی چھار بلوچ ورنا کراچی آن دزگیر کننگ آن گڈ بیگواہ کرینے۔
بیگواہ کننگوک ورناک زین بلوچ، ظریف احمد، اکرم بلوچ و انیس بلوچ نا پن ئٹ درست مسنو۔
بلوچ یکجہتی کمیٹی چاگڑدی حوالکاری میڈیا غا بیان ئس شنگ کرسا پارینے کہ چھار انگا ورنا تہ اینو 15 اکتوبر 2024 آ زوراکی ئٹ بیگواہ کننگانے۔ او غٹ پنجگور نا علاقہ پروم نا جہی ءُ و جانجوڑی کن کراچی نا اسپتال ئسے آ بسوسر۔
بی وائے سی نا بیان نا رد ئٹ او کراچی نا جہہ صدر نا اسہ ہوٹل ئسیٹی رہینگ ئٹی اسر۔ خن ئٹ خنوکا شاہد آتا رد ئٹ پولیس و ایجنسی نا کارندہ غاک ہوٹل آ چھاپہ خلِسہ ہوٹل نا منیجر تون اوار پن کروک چھار مارکو ئے دزگیر کریر و مینجر ئے پدان یلہ کننگا ولے ایلو چھار بلوچ ورنا دائسکان بیگواہ ءُ۔
بی وائے سی تینا بیان ئٹ پارے کہ بلوچستان ئٹ زوراکی نا بیگواہی و بلوچ آتا زنک کشی ئے برجاء تخنگ ہڑے نا کاریم ئس جوڑ مسنے۔ نن جہانی کہول و بندغی حق آتا تنظیم آتیان خواست کینہ کہ او بلوچ آتا برخلاف دننگا بے بندغی کاریم تا نوٹس ہلیر۔
