ڈیرہ بگٹی نا علاقہ سوئی ٹی پاکستانی لشکر نا لشکر کشی چھارمیکو دے ہم برجاء ءِ۔
حوال تروکا تا رد ئٹ سوئی نا جہہ کچی کینال ئٹ مسٹمی نمبر شاخ ئٹ پاکستانی لشکر نا لشکر کشی برجاء ءِ ہراڑے کیہی بندغ آتا اُرا تہ خاخر تننگانے۔
اندن حوال تروکا تا پاننگ ءِ کہ لنجو، سگاری و رئیس توک ئٹی پاکستانی لشکر وار وار آ آبادی تیا مارٹر گولہ خسنگ ءِ۔
جہی بندغ آتا پاننگ ءِ کہ اسہ ڈرون ئسیٹ ننا اُرا تیا بمباری کننگ ءُ۔
ایلو کنڈ آن حوال رسینگانے کہ استو سگاری ٹی پاکستانی لشکر خان محمد بگٹی نا اُراغا ماٹر گولہ خلکنے ہراڑان خان محمد بگٹی و اونا اُرا گودی و اسہ چُناس ٹپی مسنو۔
جہی حوال تروکا تا رد ئٹ اسہ وڑ لشکر کشی مننگ نا سوب آن کسرک بند ءُ و علاقہ ئٹ کُننگ نا گڑا تا کاختی ودی مننگ ءِ۔
