بلوچ آجوہی دوست راہشون و بلوچستان لبریشن فرنٹ نا کماش ڈاکٹر اللہ نذر بلوچ پارینے کہ ڈیرہ بگٹی ٹی پاکستانی لشکر نا لشکر کشی بلوچ راج ئنا برخلاف زنک کشی نا بشخ ئس ءِ۔ اینو نہ بیرہ ڈیرہ بگٹی بلکہ تیبہ بلوچستان پاکستان نا تادی تا گواچی ءِ۔ پاکستانی لشکر و اونا ادارہ غاک بلوچ نا دتر تون ہولی گوازی کننگ ءُ۔ مَش تیٹ آباد لکھ آ بلوچ آک مریر یا پِڑ، خلق و شاری علاقہ آتا آبادیک، اینو کل پاکستانی لشکر نا زوراکی، تادی و چرجوئی ئٹ زنک کشی نا گواچی ءُ۔
او پارے کہ بلوچ اینو اسہ دیہاڑی مرحلہ ئسے آن گدرینگ ءِ و پاکستان تون دا ننا گڈیکو جنگ ءِ۔ دا جنگ ئٹی تینا بشخ ئے شاغوکا و ہڑاند مروکا، تومکا کڑد آک استان دننگوفس۔ ہرا بلوچ آجوئی کن تینا ساہ و مال، سِر و مڈی تِہ ندر کننگ ءِ، دیہاڑ نا پنّو آتیا اونا پن و کڑد ساندہ کن گچین وڑ ئٹ لکھنگو۔ ولے ہرا بندغ، ٹولی یا پارٹی بلوچ راجی تحریک نا برخلاف دشمن تون اوار مس، چائے او سیاسی وڑ ئٹ مرے یا مخبر و کرایہ نا قاتل جوڑ مرسا بلوچ زنک کشی ٹی اوار مرے، دیہاڑ اوفتیان گندہ حساب ہلو۔
او ودیک پارے کہ تدوکا بیست و چھار سال آن پاکستان ئٹی بلوچ زنک کشی، زوراکی نا بیگواہی، کُشت ءَ خون و مال ءَ مڈی تا لُٹ ءَ پُھل برجاء ءِ۔ پاکستان ہرا وڑ تینا زوراکی و تادی تیٹ ودکی کننگ ءِ، بلوچ مزاحمت کارک ہم دشمن نا خاطر ئے کروفس۔ اینو اسہ کنڈ آن دشمن ءِ و ایلو کنڈ آن بلوچ ئٹی منَہ ٹولی یا بندغ ءُ ہرا دشمن نا سنگت جوڑ مسنو و دشمن تون ہم کوپہ ءُ۔
ڈاکٹر اللہ نذر بلوچ پارے کہ ای پھاش لوز آتیٹ پاوہ کہ بلوچ تینا ڈغار دشمن تِہ اسل بخشوف۔ اگہ اوفتا دو آن یا کڑد ئنا سوب آن اسہ بلوچ فرزند ئسے نسخان مس تو او فرزند اسہ خاہوت نا آخہ بلکہ تیبہ راج ئنا فرزند ءِ دا تیبہ راج ئنا نسخان مرو۔ اونا دتر ئے بخشنگ یا معاوضہ نا اختیار اونا خاہوت ئے ہم اف۔ تیبہ راج فیصلہ کرو کہ ہمو خونی ئے بخشوئی ءِ یا سِزا تروئی ءِ۔ کنا عٹکل ئٹ اینو اسکان بلوچ اسہ راج ئسے نا حیثیت ئٹ تینا دشمن ئے بخشتنے۔
بلوچ آجوئی دوست راہشون ودیک پارے کہ اینو بلوچ ورنا تا قربانیک و جہد نہ بیرہ بلوچستان نا آجوئی کن ءِ بلکہ او جہانی تیبر آ ہر ہمو راج تون اواری نا درشانی کیرہ ہرا آجوئی، انصاف و بندغی حق آتیکن جہد کننگ ءُ۔ دا سخت انگا راجی جنگ ئٹی ہمرو ڈیہہ، راج یا تنظیم ئس ننے کمک کرے اوڑکن ننے آ اوفتا تھورو مرو، ولے بلوچ راج جہانی کہول آن کمک آن ویتہ تینا جہد ئے سرسوبی ئٹ برجاء تخانے۔
او پارے کہ ننے تینا تاغت آ باور ءِ انتئے کہ دا اسہ فرد ئسے نا اف دانا پد آ کروڑ آ بلوچ آتا مخ تفی و کمک اوار ءِ۔ ولے جہانی تیبر آ یا جہانی کہول ئے پہہ مروئی ءِ کہ کوزہ کننگ، دہشت گردی یا زوراکی و تادی تا برخلاف جنگ اسہ ریاست ئسے نا تہہ ئنا ویل مفک بلکہ دا تیبہ جہان نا اوڑدئی فرض ءِ و نن تینا دا فرض ئے پورو کرون۔
