“کوالخواہ تا کنڈ آن دڑکو و بیہار آن ویتہ ہم بلوچ نیوڑیک انصاف نا خواست کننگ ءُ و دا جہد ئنا راہشونی ئے کننگ ءُ”، صفیہ منظور پارے
برلن جرمنی ٹی بلوچ نیشنل موومنٹ ( بی این ایم) نا کُمک صدر صفیہ منظور امن کن نیاڑی تا کانفرنس ئٹ، بلوچستان ئٹی انصاف و بندغی حق آتیکن جہد کروکا بلوچ نیاڑی تا کڑد آ ہیت کرے۔
برلن ئٹی ’’ جنگ و امن: مسٹمیکو جہانی جنگ ئٹی خود ارادیت و خود تنظیمی‘‘ نا سرحال آ اڈ ہلوک مجلس ئٹ جنگ زدہ غا علاقہ آتیٹ نیاڑ تا کڑد و امن نا کوشست آتیٹ کمک آ پام تننگا۔
ہیت کننگ نا وختا صفیہ منظور پاکستانی کوزہ ٹی بلوچ الس ئنا جہد ئنا بارث ئٹ شابیتی ئٹ پارے۔
او پارے کہ بلوچستان ئٹی زوراکی نا بیگواہی و فوجی کریک ڈاؤن نا بھرم ئٹی بلوچ نیاڑیک انصاف کن جہد ئنا راہشون جوڑ مرسا مونا بننگ ءُ۔ کوالخواہ تا کنڈ آن دڑکو و بیہار تننگ آن ویتہ ہم بلوچ نیاڑیک تینا بیگواہ کننگوک بندغ آتیکن انصاف خواہنگ ءُ و دا جہد ئنا راہشونی ئے کننگ ءُ۔
او بلوچ راجی تحریک نا پنی آ شخصیت کریمہ بلوچ نا بارث ئٹ پارے کہ شہید بانک کریمہ، بلوچ اسٹوڈنٹس آرگنائزیشن ( بی ایس او) نا چئیرپرسن مروکا اولیکو نیاڑی اس، ہرا نا راہشونی بھاز آ بلوچ آتا حق کن توار بڑز کننگ نا پنت تس۔
او ماہ رنگ بلوچ و سمی دین بلوچ نا کاریم تیا روشنائی شاغا، ہرا کہ بلوچ نیاڑی تا حق و بیگواہ غا بندغ آتیکن انصاف کن جہد کننگ ءُ۔
او جہانی کہول آن خواست کرے کہ او بلوچستان تون ہم کوپہ مریر و بندغی حق آتا لتاڑ آ معلومداری تننگ ئٹ کمک کیر۔
بلوچ نیشنل موومنٹ ( بی این ایم ) بلوچ نیاڑی تا راجی آجوئی و بندغی حق آتا جنگ ئٹی اوڑدئی نا وکالت ئے کیک، انتئے کہ او ظلم ئنا برخلاف مزاحمت ئٹی اسہ توننگ مفروکو کڑد ئسے نا گودیک ءُ۔
