این ڈی ایم اے بحیرہ بلوچ ئٹی مننگ کروک طوفانی حالیت نا بارث ئٹ خبڑدار کرے۔ الرٹ نا رد ئٹ ساڑی آ سسٹم سمندری طوفان ئٹ مٹ مننگ و گمانی طوفان بھارت آن قطبی دے کہی نا کنڈ آ ودنگ نا گمان ارے۔
این ڈی ایم اے نا پاننگ ءِ کہ مننگ کروک طوفان ئے ودی کروکا سسٹم لکشدیپ انڈیا نا خڑک آٹے و دا سسٹم اکتوبر نا مسٹمیکو ہفتہ ٹی سمندری پٹی تون ڈک لگنگ کیک۔
ایلو کنڈ آن پِھر ئنا سوب آن ودی مروکا دے کہی تہو تاسسٹم بلوچستان ئٹی پیہانے ہرانا رد ئٹ شال تون اوار بلوچستان نا جتا ضلع تیٹ پِھر شلو۔
شال و ہیب کھیب ئٹ شنزہ آن پھدینی ٹی ودکی مسنے، محکمہ مُد دو شمبے نا دے ہم شال تون اوار بلوچستان نا 6 ضلع ٹی ودیک پھر ئنا پارینے۔
گزشتہ 24 ساعت ئٹی ڈیہہ ئٹی کُل آن زیات پھر کوئٹہ ٹی 9 ملی میٹر ریکارڈ کننگانے، کوئٹہ و ہیب کھیب ئٹی دو شمبے نا دے سہب ئنا ہورہ گروک و تیز تہو تون شنزہ کرے۔
بلوچستان نا قطبی علاقہ توبہ اچکزئی، شیلہ باغ، توبہ کاکڑی، پشین، نوشکی، قلعہ عبداللہ ٹی ہم پھر مسّنے، نوشکی ٹی جھل و گْوز آتیٹ لوڑو کرینے و کسر تا دِیر بنّنگ آن ہِن ءَ بر زیمی مسّنے۔
مُد ئنا محکمہ نا پاننگ ءِ کہ سئے شمبے آ بلوچستان ئٹی بھازا ہندا تیٹ آسمان آ گِڑاس نود مرو و ژوب، بارکھان، موسیٰ خیل، لورالائی، خضدار و شال ئٹی گِڑاس جہہ تیا زوراک آ چھرک و ہورہ گِروک تون پِھر ئنا گمان ارے۔
