کراچی ٹی اینو بلوچ یکجہتی کمیٹی نا بنجائی آرگنائزر ڈاکٹر ماہرنگ بلوچ ئے ایف آئی اے نا کنڈ آن نیویارک آ سفر کننگ آن توننگانے۔
ڈاکٹر ماہرنگ بلوچ چاگڑدی حوالکاری میڈیا غا شنگ کروک تینا ویڈیو کلہو ئٹ پارے کہ اینو کنے ٹائم (TIME) میگزین نا اڈ تروک مجلس ئٹ اوڑدئی کن نیویارک آ ہنوئی اس، ہراڑے کنے ایلو سروک آتون اوار بٹنگاسر ہرافتا پِنک ٹائم میگزین نا کُل آن زیات زہم تخوکا شخصیت آتا سال 2024 نا لڑ ئٹ اوار کننگاسس۔
او پارے کہ کنے ویتہ قانودی یا پین سوب آن، کراچی انٹرنیشنل ایئرپورٹ آ ایف آئی اے نا کارندہ غاک توریر ہرا کنا “ہن ءَ بر نا آجوئی” نا بنداوی بندغی حق ئنا لتاڑ ءِ۔
او پارے کہ دا کارروائی بلوچ کن بش مروکا توار تِہ توننگ و ریاست نا ودوکا خلیس و بے رکھی ئے پھاش کیک۔ کنا سفر ئے توننگ نا ہچو جائز مسخت اوفتتون الو، و کنا مسخت ہم بلوچ نا توار ئے جہانی تیبر آ سر کننگ آن ویتہ پین ہچ الو۔
او پارے کہ دا بلوچستان نا حالیت آتا بارث ئٹ کنا معلومداری تننگ ئے توننگ، و بلوچستان ئٹی کیہی دہک آن برجاء بندغی حق آتا لتاڑ ئے ڈھکنگ نا ریاستی چَم ئس ءِ۔
او پارے کہ داکان بیدس ریاست کنے کنا جائز سفر آن توننگ نا آجوئی نا حق آن نمن مسنے و کنا درشانی و ہن ءَ بر نا آجوئی نا حق ئے کاریم ئٹ ہتنگ آن توننگ خواہک۔
او پارے کہ ریاست نا دننگا سفری رکھ، بلوچ بندغی حق آتا رکھوک و کاریم کروکا تا برخلاف ودوکا کریک ڈاؤن نا بشخ ئس ءِ۔ ای تینا ہن ءَ بر نا دا حق آ بے انصافی ئٹ خلوکا رکھ ئنا برخلاف جہد کروٹ۔
