بی ایس او نا مسکوئی چئیرمین و بی این ایم نا مسکوہی سیکریٹری جنرل ایڈووکیٹ رحیم بلوچ چاگڑدی حوالکاری میڈیا ایکس آ اسہ پوسٹ ئس کرسا پی ٹی آیم آ حکومت نا کنڈ آن خلوکا رکھ آ تینا خیال آتا درشانی کرے۔
او تینا پوسٹ ئٹ پارے کہ پشتون تحفظ موومنٹ اسہ چنکو وخت ئسیٹی نہ بیرہ پختون آتا حق کن اسہ زہم تخوکو توار ئس جوڑ مس بلکہ او پختونخوا نا قدرتی مڈی تِہ لُٹوکا ریاستی ڈٹ و ڈالری جنگ آتا برخلاف پختون الس ئے شعور تس۔ اوفتا سیوتی و اوفتِہ منظم و متحرک کرسہ پنجابی جرنیل آتا مونا ہیس و اسہ سوگوؤ دیوال ئسے نا وڑ سلیفے۔
او پارے کہ جی ایچ کیو نا ڈٹ بندی کروکا اول دے آن پی ٹی ایم ئے بیدادی آ چُچلائی تننگ کن ہر وڑ ئنا چم بازی و نیمون کاریم ئٹ ہیسر و اوفتِہ خار تننگ نا کوشست کریر تاکہ اڑزانی ئٹ پختون آتا دا جمہوری تحرک ئے دہشتگردی تون گھنڈنگ کیر و داڑا رکھ خلنگ کیر، ولے پی ٹی ایم نا سروک آک، روہشونک و باسک آک ریاست نا دننگا چم بازی تا ورندی ئے جیرت و جمہوری وڑ ئٹ ترسا ریاست نا چم بازی تِہ بےسوب کریر۔
اونا ودیک پاننگ اس کہ پی ٹی ایم نا سگ و مستقل مزاجی ریاست ئے ایسر ئٹ بےپڑدہ کرے۔ اینو پنجابی اشرافیہ پی ٹی ایم آ رکھ خلِسہ اودے کالعدم دہشتگرد تنظیم آتا لڑ ئٹ اوار تو کرے ولے دا فیصلہ نا جواز ئٹ ریاست تون ہچو براہ راست یا واقعاتی ثبوت اف۔
او پارے کہ پی ٹی ایم پختون خطہ ٹی ریاست پاکستان نا مکروہ اُست خواہی تِہ بے پڑدہ کرینے۔ ریاست پاکستان نا دا خام خیالی ءِ کہ او بیرہ اسہ نوٹیفکیشن ئس شنگ کرسہ پی ٹی ایم ئے کالعدم کرسہ 11 اکتوبر نا ”پشتون عدالت“ ئے اڈ تننگ آن توننگ کرو و پختون آتا دا سوگو آ توار ئے توننگ کرو۔ دا اسہ پن کشوکو راجی تحریک ئس ءِ ہرا نا روتہ، رغ و ریشہ غاک الس تون تفوک ءُ۔
رحیم بلوچ پارے کہ پنجابی اشرافیہ نا دا فیصلہ پختون الس کن ریاست پاکستان نا استعماری نوعیت و فطرت ئے پُہہ مننگ ئٹ اڑزانی ودی کرینے۔ داسا سادہ غا پشتون الس اڑزانی ئٹ پُہہ مننگ کرو کہ پاکستان ئٹی اوفتا حیثیت بیرہ اسہ کالونی ئسے نا ءِ۔
او پارے کہ ہمر انگریز پختون آتِہ فوج و فرنٹیئر کور ئٹی کرایہ نا کھسفوک آتا وڑ بھرتی کرسہ تحریک آزادی نا برخلاف اوفتا جنگی لائخی تِہ کاریک ئٹ ہتسہ تینا استعماریت ئے برصغیر ہند ئٹی سوگو کرے، پنجابی اشرافیہ ہم تینا ہمو خواجہ غا تا اندا پالیسی ئے برجاء تخا و بلوچ تحریک آزادی نا برخلاف اوفتِہ مرسنری فورس ئٹی بھرتی کرسہ کاریم ئٹ ہتسہ کرے ولے پی ٹی ایم نا تحریک نا سوب آن داسا پختون الس پہہ مرو کہ ریاست پاکستان ئٹی پختون آتیکن پنجاب تون اوار بریبر و شرفداری نا ہند ئنا دوئی کننگ بیرہ اسہ دروغ ئس ءِ۔
او ایسر ئٹ پارے کہ داسا پشتون راج تینا راجی حق آتا رکھ، تینا ڈیہہ و مڈی آ تینا اختیار و راجی وقار و شرف ئے دا پنجابی نوآبادیاتی ریاست آن آجوئی نا دروشن ئٹ خنو۔
