آواران آن پاکستانی لشکر نا دو آن زورانسری بیگواہ کننگوک دلجان نا خاہوت نا کنڈ آن تولوک برانز مسٹمیکو دے برجاء ءِ۔
تولوک برانز تون اواری نا درشانی کن اِرا دے آن آواران نا دکاندارک تینا دکان تہ بند کرسا ہڑتال کرینو۔
دا وختا تولوک برانز ئٹ چنا نیاڑی تا بھلو کچ ئس اوار ءِ و اوفتا پاننگ ءِ کہ ایسکان دلجان ئے یلہ کننگ متنے او تینا برانز ئے برجاء تخور۔
بی وائی سی آواران ہنکین نا کنڈ آن اسہ پوسٹ ئسیٹی پاننگانے کہ ضلعی انتظامیہ خاہوت آتِہ بِننگ نا جاگہ غا علاقہ نا شرفدار آتِہ گُدریسہ برانز ئے ایسر کننگ نا پاننگ ءِ۔
او پاریر کہ نن بندغ آتِیان خواست کینہ کہ ضلعی انتظامیہ نا کلہو ئے سر کننگ نا جاگہ غا ببو دلجان نا رکھوک آجوئی کن ننتو اوار مبو، و دے ءَ نن ننتو تولبو و اندازہ کبو کہ خاہوت ارا ڈکھ آن گدرینگنگ ءِ۔
ایلو کنڈ آن بلوچستان نا ضلع پنجگور ئٹ زوراکی نا بیگواہی، بے ایمنی و پُہریا تا بند کننگ نا برخلاف اینو بی این پی (عوامی) نا کنڈ آن شٹر ڈاؤن ہڑتال برجاء ءِ۔
پنجگور ئٹ ہڑتال نا سوب آن چُنکا بھلا کاروباری بنجاہک بند ءُ۔
پنجگور ئٹ ہنوکابہفتہ عابد نور و صابر نور ئے پاکستانی لشکر اوفتا اُراغان دزگیر کننگ آن گڈ بیگواہ کریسس، ہراکان گڈ اوفتا خاہوت تولوک برانز کرسا اوفتا آجوئی نا خواست کرے و ریلی ہم کشا۔
پدان خاہوت و کوالخواہ تا نیامٹ ہیت تران مس و برانز ایسر کننگا، کوالخواک پاریسر کہ بیست و چھار ساعت ئٹی تومکا ایلم تہ یلہ کننگو ولے دائسکان اوفتا ہچ ڈس اف۔
ایلو کنڈ آن اسہ ہفتہ ٹی پنجگور ئٹی مُسہ بندغ کھسفنگانو، و گیشتر بندغ آتا پُہریا باڈر تون تفوک ءِ و باڈر نا بند مننگ و رکھ ئنا سوب آن بارڈر نا کاروبار زیمی مسنے و مخلوق اِرا وخت ئنا ارغ نا آہری ءِ۔ دا کل تدینی تا برخلاف اینو پنجگور ئٹ شٹرڈاون برجاء ءِ۔
