جنیوا ٹی بلوچ نیشنل موومنٹ (بی این ایم ) نا کنڈ آن اڈ ہلوک پنچمیکو جہانی بلوچستان کانفرنس نا وختا، پیس فار ایشیا (ایشیا کن ایمنی) نا نمائندہ اینہیلینا بلوچستان ئٹی برجاء بندغی حق آتا لتاڑ تون مون تننگ نا گرج آ زور تس۔
او پارے “اینو نن بلوچستان نا مخلوق آ ریاست نا منظم زوراکی، زورانسری بیگواہی و استحصال نا کنڈ آ پام ترفنگ کن مُچ مسونن ہرافتتون اوڑے مخلوق مون تننگ ءِ، ہرا قدرتی وسائل آتیان مالا مال خطہ ئس ءِ ولے تینا بنداوی حق آتیان بد بٹوک ءِ۔‘‘
او دا ہیت ئنا پیدواری ئے کرے کہ امر پنچ دہک آن سوئی گیس فیلڈ تا استحصال مننگ ءِ، لاہور و اسلام آباد کون آ شارک دا وسائل آن سواد ہرفنگ ءُ، ولے سوئی نا ہندی مخلوق دا مڈی آن مُر کننگانے۔ دا بلوچ الس ئنا زیہا مروکا معاشی بےانصافی تا اسہ مثیل ئس ءِ۔
انہیلینا چین پاکستان اقتصادی راہداری (سی پیک) آ ہیت کرسا پارے کہ دا ڈٹ شونداری ہتنگ نا جاگہ غا زوراکی نا سوب جوڑ مسنے۔ سی پیک ئے رکھینگ نا نیمون ئٹ بلوچستان ئٹی لشکر کشی کن فوج مُچ کننگ ءِ، ڈغار تیا کوزہ، ہمپ ءَ لڈ، زوراکی نا بیگواہی و بیدس عدالت بندغ تِہ کھسفنگ تون اوار بندغی حق آتا لتاڑ ئٹ ودکی مسنے۔
او جہانی کہول آن بلوچستان ئٹی مروکا بندغی حق آتا لتاڑ آ آزادانہ پٹ ءَ پول آ زور ترسا کارروائی کننگ نا خواست کرسا بلوچ الس ئنا حق خودارادیت نا مخ تفی ئے کرے و اوفتا توار ئے بِننگ ئے یخینی جوڑ کننگ نا اہمیت ئے پھاش کرے۔
ہیت کننگ نا وختا او پارے، ” استحصال، زوراکی و بلوچ راج ئنا جہد آزادی ئے نظر انداز کننگ مفک۔ دا ننا اشتماعی ذمہ داری ءِ کہ نن بلوچستان کن انصاف، وقار و اوفتا خود ارادیت کن کاریم کین۔
دا کانفرنس نا مسخت بلوچستان نا حالیت آتا بارث ئٹ سرپندی تننگ اس و جہانی تیبر آ بلوچ الس ئنا حق ئنا وکالت کننگ اس ہرا سرسوبی ئٹ ایسر مس۔
