حوال تا رد ئٹ ڈیرہ مراد جمالی، خضدار و شال ئٹ سمکاری نا جتا تدینی تیٹ پنچ بندغ بیران اندن شش ٹپی مسنو ہرافتیٹ پولیس کارندہ ہم اوار ءِ۔
شابیتی حوال تا رد ئٹ ڈیرہ مراد جمالی نا گیٹ آ درست مفروکا سلاہ بند بندغ آک قیدی تیا سُمکاری کریر ہرا نا سوب آن نظر ہیجوانی پنیئو قیدی ئس ہند آ بیران مس و مُسہ پولیس کارندہ ٹپی مسُر۔
پولیس کارندہ تا ورندی سُمکاری ٹی اسہ جلہو کار ئس کھسک و ارٹمیکو ٹپی مس۔
حوال تروکا تا پاننگ ءِ کہ ڈسٹرکٹ جیل ئنا تہٹی عمرانی قبیلہ نا منہ بندغ جیل ئنا تہٹی جمالی قبیلہ آن تعلقداری تخوکو بندغ ئسے کھسفینو۔
ایلو کنڈ آن خضدار و شال ئٹ سُمکاری نا تدینی تیٹ پولیس کارندہ تون اوار مُسہ بندغ بیران، اِرٹ ٹپی مسر۔
حوال تا رد ئٹ خضدار نا ہند جھالاوان کمپلیکس ئٹ پولیس و دز آتا نیام ئٹ سُمکاری آن اسہ پولیس کارندہ ئسے تون اوار اسہ دُز ئس خلنگا اسٹ ٹپی مس۔
پولیس نا رِد ئٹ اسہ دُز ئسے دزگیر کننگانے۔ سُمکاری ٹی اسہ پین بندغ ئس کم ٹپی مسنے۔
اندن شال اسپینی روڈ آ سلاہ بند بندغ آتا سُمکاری آن شمس پنیئو ورنا ئس بیران و نصرت اللہ ٹپی مسنے۔
پولیس نا رِد ئٹ ٹپی مروکا نا حالیت بھاز خراب ءِ۔ ٹپی و کھئوکا نا جون ئے سول اسپتال آ دریر ہراڑے المی کاروائی آن پد جون ئے خاہوت نا دُوٹی تِسُر۔
