بلوچستان نا ضلع پنجگور ئٹی اینو سُہب ئنا پاکستانی لشکر نا دوآن بیگواہ مروکا اییلُم صابر نور و عابد نور نا خاہوت برانز کرسہ سی پیک کسرئے پنجگور نا علاقہ سرادک زم زم ہوٹل نا خُڑک آ بند کرے۔
کسر آ برانز نا سوب آن کراچی، پنجگور، کیچ و شال آن بروک ہنوکا تیکن کسر بند مس، تومکا کُنڈ آ تیان کیہی مسافر و اُلاخ آک گھٹ مسر۔
دا وختا جمعیت علمائے اسلام و ایلو تنظیم آتا رہشون و سول سوسائٹی نا نمائندہ آک برانز جاہ آ اواری نا درشانی کن بسُر و حکومت آن خواست کریر کہ صابر نور و اونا ایلم عابد نور ئے زوت آجو کیر۔
خاہوت نا کُنڈ آن برانز آن مالو ہم اینو پریس کانفرنس کننگا، اوڑے اوفک انتظامیہ ئے دو بجہ نا وخت تِسُر کہ تومکا ایلُم تے آجو کننگ مرے اگہ نا سی پیک کسرے بند کننگ مرو۔
یات مرے کہ ہندا تومکا ایلُم تِہ اینو سُہب ئنا پاکستانی لشکر پنجگور نا علاقہ تار آفس آ چھاپہ خلسہ بیگواہ کرینے۔
