ہنوکا دے تیٹ خاران بازار آن پاکستانی لشکر نا دو آن بیگواہ کننگوک بندغ آتا آجوئی کن خاہوت آتا برانز برجاء ءِ، ایلو کنڈ آن کولواہ آن بیگواہ ورنا ہفت سال گدرینگ آن پد ہم آجو متو۔
حوال تا رد ئٹ خاران بازار آن سی ٹی ڈی نا دو آن بیگواہ کننگوک خاران نا جہی امان اللہ محمد حسنی، امین اللہ، ارشاد احمد، دواد بلوچ نا زوراکی نا بیگواہی نا برخلاف اوفتا خاہوت آک خاران ریڈ زون مسنگ پرسن چوک آ اینو مسٹمیکو دے ہم برانز برجاء ءِ، و بازار تیبہ ہڑتال کرسا بند کننگانے۔
پاننگک کہ بیگواہ غا بندغ آتا خاہوت آتا حالیت خراب ءِ و نیاڑیک بی سُدھ مسر ہرافتے اسپتال آ رادہ کننگا۔
برانز جاہ آن او ہیت کرسا پاریر کہ تدوکا مُسہ دے آن خاران ریڈ زون ئٹ برانز برجاء ءِ، چُنا نیاڑیک ہم داڑے ساڑی ءُ ولے کوالخواہ و ذمہ وار آتے شرم ہم بفک کہ او برانز جاہ آ برسا اوفتتون اواری نا درشانی کیر یا اوفتا بندغ آتا آجوئی نا باور ایتر، اوفتیکن خاران نا شاریک دہشتگرد ءُ ہرا برانز کننگ ءُ۔
او پاریر کہ ضلعی انتظامیہ گچین مروک نمائندہ و پاکستانی لشکر نا رویہ ئے خنِسہ خاران نا مخلوق نا اُست ئٹ خار ودی مننگ ءِ ہرا ریاست کن اسہ جوانو ہیت ئس اف۔
او پاریر کہ بیگواہ امان اللہ، امین الله، ارشاد احمد و داود بلوچ ئے زوت آجو کننگ متو تو برانز ئے گیشتر کرون۔
ایلو کنڈ آن بلوچستان نا ضلع کیچ ئنا ہند کولواہ بلور نا جہی نوربخش نا مار مختیار بلوچ نا خاہوت تینا شنگ کروک بیان ئٹی پارینے کہ اودے پاکستانی لشکر تربت آن 11 دسمبر 2016 آ دزگیر کرسا درے ہراکان گڈ اونا ہچ ڈس اف۔
او سیاسی، چاگڑدی و بندغی حق آتا ادارہ تتون اوار بلوچ یکجہتی کمیٹی آن مختیار بلوچ نا رکھوک آجوئی کن توار بڑز کننگ نا خواست کرینو۔
