بلوچستان لبریشن فرنٹ نا ترجمان میجر گہرام میڈیا ٹی شنگ کروک تینا درشان ئٹی پارینے کہ ننا سرمچارک تنظیم نا انٹلیجنس ٹیم ئنا معلومداری نا بنیات آ کاروائی کرسا آواران نا ہند جھل جھاؤ آن کوزہ گیر پاکستانی لشکر نا کمکار احمد بخش عرف کچّو، باوہ نا پن کریم بخش ئے دزگیر کریر، ریاستی ایجنٹ کچّو سال ئسے آن زیات کوزہ گیر لشکر کن مخبری نا کاریم کریکہ۔
او پارے کہ سونج رونج نا وختا او تینٹ منّا کہ او جھل جھاؤ نا ہند ئٹی پاکستانی لشکر کن مخبری کریکہ و 9 اگست 2024 آ سنگت سرمچار شہید سیکنڈ لیفٹیننٹ شمبین عرف شہیک بلوچ نا شہادت ئٹی تُد اسک۔
ترجمان پارے کہ احمد بخش عرف کچّو سرسوج نا وختا ہمو کل بندغ تا پِن ئے ہلکُنے ہراکہ شہید لیفٹیننٹ شہیک نا شہادت ٹی تُد اسُر و جھاؤ و اونا ہیب کھیب ئٹی پاکستانی لشکر کن مخبری و کمکار نا وڑ ئٹ کاریم کیرہ، و ہندا مخبر نا اعترافی ویڈیو پارٹی تون تخوک ءِ و بکار مس تو راج ئنا مونا ہتنگ مرو۔
بی ایل ایف نا ترجمان میجر گہرام پین پارے کہ ریاستی آلہ کار احمد بخش عرف کچّو تینا سنگت آتا پیدواری و تنظیم نا انٹلیجنس ٹیم ئنا معلومداری تا بنیات آ شہید لیفٹیننٹ شہیک بلوچ نا شہادت ئٹی اوار ریاستی ڈیتھ اسکواڈ نا کل کارندہ تِہ اوفتا ایسر اسکان سر کننگ مرو۔
او پارے کہ ریاستی ایجنٹ احمد بخش عرف کچّو ئے درو آواران نا ہند جھل جھاؤ ٹی بی ایل ایف نا سرمچارک سُمکاری کرسا اونا ایسر آ سر کریر۔
او ایسر ئٹ پارے کہ بی ایل ایف ریاستی ایجنٹ احمد بخش عرف کچّو ئے خلنگ نا زمہ واری ئے ہرفک۔
