خضدار نا علاقہ مولہ چٹوک آن پیرو کماش ئسے نا جون خننگانے، اندن وندر نا خُڑکا ٹرک و ٹریکٹر ئسے نا نیام ئٹی برِسہ موٹر سائیکل سوار اِرا بندغ بیران مسر۔
حوال تا رِد ئٹ خضدار آن یک سد و پنجاہ کلو میٹر مُر سب تحصیل مولہ چٹوک نا ہند آ اسہ پیرو کماش ئسے نا جون خننگانے۔
اودے ہندی بندغ آک تینا کمک ئٹ چاہنداری کن آر ایچ سی اسپتال کنواں آ رسیفیر۔
اندن وندر نا خُڑکا ٹرک و ٹریکٹر نا نیام ئٹی برِسہ ڈک لگنگ آن موٹر سائیکل سوار اِرا بندغ بیران مسنو۔
حوال تا رِد ئٹ استو شال کراچی بھلا دگ N-25 آ وندر نا کھیب آ مراد ہوٹل نا ہند آ ڈک لگنگ آن موٹر سائیکل سوار اِرا بندغ بیران مسنو۔
تومکا اللہ بچایا نا مار ربنواز و اونا سنگت محمد امین نا مار زاہد احمد نا پن ئٹ درست مسنو ہرافک حب آن وندر آ بننگ اسُر۔
حوال رسینگ آن گڈ ریسکیو 1122 مرک سینٹر وندر نا کمکی ٹولیک تدینی نا جاگہ غا بَسُر۔
مرک ریسکیو سینٹر نا ایمبولینس ئٹ جون تِہ رورل ہیلتھ سینٹر وندر آ دریر۔ ٹرک و ٹریکٹر ئے وندر پولیس ہلِسہ الّمی کاروائی ئے بِنا کرے۔
