وائس فار بلوچ مسنگ پرسنز نا چئیرمین نصراللہ بلوچ پارینے کہ محمود علی لانگو و محمد انور محمد شہی نا زوراکی ئٹ بیگواہی نا شابیت حوال تِہ اوفتا خاہوت تنظیم ئے تسنے۔
محمود علی لانگو نا خاہوت تنظیم ئے پارینے کہ محمد عثمان نا مار محمود خَدو 18 جون آ اوغانستان نا ہند نمروز آن زوراکی ئٹ بیگواہی نا گواچی مسنے۔
اوفک دا دوبہ ہم خلکنو کہ محمود علی ئے حکومت پاکستان نا پاننگ آ اوغانستان آن بےقانودی دزگیر کننگ آن پد پاکستان آ ہیسنو و او پاکستان نا ڈھکوک ادارہ غا تا دزگیر ئٹی ءِ انتئے کہ محمود علی نا برخلاف بلوچستان ئٹی مَنہ ایف آئی آر ہم نوشت ءِ ہرانا سوب آن اونا دزگیری کن اوفتا اُراغا کیہی وار چھاپہ ہم خلنگ مسنے، و او دزگیری نا خُلیس آن اوغانستان آ ہناسس و اونگا بلوچ باہوٹ نا حیثیت ئٹ رہینگ اسک۔
اندن محمد انوار محمد شہی نا خاہوت تنظیم ئے شابیت حوال تِہ ترسا پارے کہ محمد مراد نا مار محمد انور ئے پاکستانی لشکر 28 فروری 2019 ئٹی جناح ٹاؤن کوئٹہ آن بے قانودی دزگیر کننگ آن پد بیگواہ کرے واوفتے اونا بابت ئٹ ہچ معلومداری تننگ افس ہرانا سوب آن اونا خاہوت زہنی کرب و اذیت نا گواچی ءِ۔
او پاریر کہ تنظیمی تیبر آ محمود علی لانگو و محمد انور نا خاہوت ئے یخین تننگانے کہ تومکا بیگواہ مروکا بندغ تا کیس تِہ بیگواہ مروکا بندغ آتا حوالہ ئٹ جوڑ کروکا کمیشن و حکومت ئے تننگ مرو و اوفتا آجوئی کن ہر تلہ غا توار بُڑز کننگو۔
وائس فار بلوچ مسنگ پرسنز نا چیرمین نصراللہ بلوچ محمود علی لانگو و محمد انور نا زوراکی ئٹ بیگواہی نا مزمت کرے و حکومت آن خواست کریر کہ تومکا بیگواہ مروکا بندغ آتا آجوئی ٹی تینا کڑدار ئے ادا کیر اگہ اوفتیا دوبہ ارے تو اوفتے پھاش کرسا عدالت ٹی ہتیر و ریاستی راہبند نا رد ئٹ صفائی نا وارخواہی ایتر۔
