بلوچ اسٹوڈنٹس آرگنائزیشن شال ہنکین نا کنڈ آن 25 ستمبر آ شہید کامریڈ “ہانی بلوچ” ئے دروت کننگ کن کوئٹہ پریس کلب نا مونا چراغ روشن کننگا۔
بی ایس او نا بنجائی چئیرمین جیئند بلوچ مجلس ئٹ تران کرسا پارے کہ بی ایس او اینو اسہ درخشان رخت ئسے نا حیثیت ئٹ بلوچ راجی تحریک ئے جلا بشخنگ ءِ۔
او پارے کہ دا جہد ئے برجاء تخنگ ئٹ قربانی تا بے کچ کڑد آتا کسہ غاک اوار ءُ، ہرا بیدس خلیس ہر وڑ ئنا سخت انگا حالیت آتون دلیری ئٹ مون ترسا خیسُنا بیرک نا رکھ ئے کریر۔
بنجائی چئیرمین نا پاننگ اس کہ اینو ہراڑے بلوچ السی حق ئنا تحریک بلوچستان نا ہر کوچہ و خلق ئٹ بلوچ زنک کشی و بلوچ ڈیہہ ئنا استحصال نا برخلاف مزاحمت کننگ ءُ، ہموڑے بلوچ نیاڑیک تینا نت تیٹ تفوک کُل زَمزیر تِہ پرغِسہ دا تحریک ئے ہر اول دستہ نا وڑ تینا کڑد ئے سر تننگ ءُ۔
او پارے کہ گواچن ئٹ بلوچ نیاڑی تا جہد ئے دا روشن ماڑی اسکان سر کننگ ئٹ شہید کامریڈ ہانی و شہید بانک کریمہ تون اوار کیہی وے پن بلوچ جہدکار نیاڑی تا جہد اوار ءِ۔
بنجائی چئیرمین ودیک پارے کہ بی ایس او نا ہر جہدکار تینے آ فرض کرینے کہ نہ بیرہ عظیم جہد کار آتا دا میراث نا گھام پہ گھام آ رکھ ئے کرور بلکہ چرجوئی ئٹ اوفتا جہد ئنا یات آتے تینا اینو نا عمل نا بشخ جوڑ کرسا اوفتا “انقلابی استعارہ” تِہ ساندہ کن زندہ تخِسہ اوفتا روشنائی ٹی تینا بے مصالحتی جہد ئے برجاء تخور۔
