بلوچستان لبریشن فرنٹ نا ترجمان میجر گہرام بلوچ میڈیا ٹی شنگ کروک تینا درشان ئٹ پارے کہ سرمچارک بارکھان نا ہند رکھنی آن بیکڑ ڈیرہ بگٹی کسر اوچھڑی نا ہند آ ساڑی کوزہ گیر پاکستانی لشکر نا چوکی و اونا ہند آ خلوک یوفون موبائل ٹاور ئے ہشار۔
او پارے کہ 21 ستمبر نا ننکان نہہ بجہ غا سرمچارک بارکھان ئٹی اوچھڑی نا ہند آ ساڑی کوزہ گیر پاکستانی لشکر نا چوکی تیا راکٹ و بھلا سلاہ تیٹ جلہو کریر، راکٹ نا گولہ چوکی نا تہٹی تما، ہراڑان کوزہ گیر لشکر ئے جانی و مالی نسخان رسینگا، اسہ پین کاروائی ئسیٹ سرمچارک چوکی آن پنچ سد میٹر نا مُری آ خلوک یوفون موبائل ٹاور ئے ناکارہ کریر و سولر سسٹم تون اوار مشینری تِہ ہشار۔
او پارے کہ جلہو آن پد کٹھ پتلی وزیراعلی سرفراز بگٹی نا بھلنی ٹی جوڑوک ڈیتھ اسکواڈ،امن فورس نا کارندہ غاک ہمو جاگہ غا بسر و سمکاری کریر ولے سرمچارک جنگی حکمت عملی تا رد ئٹ سرسوبی ئٹ کاروائی کننگ آن پد رکھوک تینا ٹھکانہ غا تیا سر مسُر۔
اونا ودیک پاننگ اس کہ ریاستی لشکر و امن فورس نا کارندہ غاک لس آبادی آ سمکاری کریر و مارٹر خسار۔
میجر گہرام بلوچ پارے کہ ریاست پاکستان تینا پوسکنا مشینری و لکھ آ لشکر نا غرور ئٹ لس آبادی ئے ٹک کرسہ طاغت و بیدادی نا زریعت ئٹ بلوچ الس ئے توننگ خواہک، ولے سرمچار آتا سرسُوب جنگی حکمت عملی آن ریاستی لشکر ئے بلوچستان ئٹ عملی کاریم و اخلاقی شرف آن تموک ءِ۔ گواچن دادے کہ بلوچ سرمچارک بلوچ چاگڑد و بلوچ اُلس ئنا است ئٹ جاگہ کرینو۔ ہرا بی ایل ایف نا سر سُوبی نا ثبوت ءِ۔
او ایسر ئٹ پارے کہ بلوچستان لبریشن فرنٹ دا جلہو تا زمہ واری ئے ہرفک و بلوچستان آن پاکستانی لشکر نا پیشتمنگ اسکان جلہو کننگ نا عزم کیک۔
