‘وائس فار بلوچ مسنگ پرسنز’ نا بھلنی ٹی بلوچستان آن زوراکی ئٹ بیگواہی تا برخلاف شال ئٹی برجاء وی بی ایم پی نا مُرغنا بین برانزی کیمپ ئے اینو 5578 دے پورو مس۔
محمد حسن مینگل ایڈوکیٹ سپریم کورٹ، محمد امین مگسی ایڈوکیٹ و ایلوفک کیمپ آ بسر و بیگواہ غا بندغ آتا خاہوت آتون اواری نا درشانی کریر۔
کیمپ آ بروکاتون ‘وائس فار بلوچ مسنگ پرسنز’ نا وائس چیئرمین ماما قدیر بلوچ تران کرسہ پارے کہ بلوچستان ئٹی سی ٹی ڈی، ایف سی، ایجنسی و ریاست نا جہی آ لشکر (ڈیتھ اسکواڈ) نا کارندہ آتا بلوچ ورنا تہ شہید کننگ آن بلوچ راجی جہد اُلس ئٹی پِن کھٹانے و جہانی تیبر آ تحریک نا حق ئٹی پاکستان آ تنقید بلوچستان ئٹی پاکستانی حاکم و اوفتا نوکر آتیکن ڈغار ئے تنک کننگ ئٹی ءِ، ہرانا سوَب آن داسا پاکستان تینا مہالو نا برجاء غا چم آتا نغدکاری مننگ آن پد ہم تینا میڈیا و سول سوسائٹی نا بلوچ راج ئتون دروغ ئنا اواری و پاکستان نا بقاء کن بلوچستان ئٹی چم بازی تہ بدل کننگ نا خواست کرسہ تینا بےسوب آ چم آتہ برجاء تخانے۔ و مہالو آن برجاء غا بیگواہی تیٹ دے پہ دے گیشتری ہتنگ ئٹی ءِ۔
ماما قدیر بلوچ پارے کہ بلوچ ورناک ہڑدے زوراکی ئٹ بیگواہ کننگرہ و ڈیتھ اسکواڈ نا کارندہ غاک ہم بلوچ آتہ خلّنگ ئٹی گھٹ ءُ ہندن مُچا بلوچستان ئٹی زور ئنا کاروائی تیٹ حالیت ئے خراب کننگ ئٹی ءُ و ایف سی بلوچ مخلوق نا برخلاف لشکرکشی و زوراکی نا بیگواہی تیٹ آختہ ءِ۔
ماما قدیر بلوچ مُستی پارے کہ پاکستان نا چم بازیک دے دے آ زورآور مننگ ئٹی ءُ، و اوٹی پین نَہاری بنّنگ ئٹی ءِ۔ ولے بلوچ راجی جہد ئنا چلّنگ و بلوچ اُلس ئنا مرضی ئٹ بیگواہ غا بندغ آتا آجوئی نا مسخت تون سلِنگ و قربانی آن پاکستانی ریاست آ دا پھاش مسنے کہ داسا ہچّو چم بازی ئس بلوچ راج ئے اونا تاریخی جہد آن مُر کننگ کپک۔
