بلوچستان نا ضلع کیچ ئنا ہند ہوشاپ تجابان و گورکوپ ئٹی لشکر کشی برجاء ءِ۔
ہندی حوالکار تا پاننگ ءِ کہ ہندا علاقہ آ تیٹ بھلو کچ ئسیٹی لشکری کارندہ آک بسنو، جتاء ہند آ تیا کسر تِہ تفنگ ءُ و مَشی آ لڑ تیا ہم کارندہ آک ہننگ آ خننگ مسنو۔
واہم لشکر کشی نا بارث ئٹ کالخواہ تا کنڈ آن دائسکان ہچو ہیت متنے، نئے کہ لشکر کشی ٹی کس ئسے نا دزگیری و جانی نسخان نا حوال رسینگانے۔
ایلو کنڈ آن بلوچستان نا ہند قلات، مستونگ و ہرنائی ٹی ہم پاکستانی لشکر نا آپریشن برجاء ءِ، پن کروک علاقہ آ تیٹ ہیلی کاپٹر آتا ہن ءَ بر ءِ۔
حوال تا رد ئٹ زاوی، تنک، شرین، پھوڑ وڈھ و شورو تون اوار جتا ہند آتیٹ لشکر کشی برجاء ء۔
قلات و مستونگ نا ہند ناگاہو و اسپلنجی ٹی ہم لشکری ہیلی کاپٹر آک خننگانو، دا رد ئٹ شابیتی حوال دائسکان دو بتنے۔
یاتی مرے کہ درو آن بولان، ہرنائی، چمالنگ تون اوار کیچ ئنا جتا ہند آ تیٹ ہم لشکر کشی برجاء ء۔
پاکستانی کالخواک دائسکان دا بارث ئٹ ہچو شابیتی حوال تتنو واہم پن کروک ہند آ تیٹ لشکر پندھ آ و اُلاخ آتیٹ بننگ آ خننگ مسنے۔
