شال ئٹی زور ئٹ بیگواہ کننگوک جہانزیب بلوچ نا آجوئی کن خاہوت نا کُنڈ آن برانز کننگا۔
برانزی ریلی ٹی وائس فار بلوچ مسنگ پرسنز، بی وائی سی، خوانندہ آک و بیگواہ کننگوک بلوچ آتا خاہوت آک بشخ ہلکُر۔
برانز ئٹی اوار مروکا بینر، کارڈ و بیگواہ غا بندغ آتا عکس ہفیسر و شار ئنا کسر تیٹ چرینگِسہ زوراکی نا بیگواہی تا برخلاف نعرہ خلکر۔
دا وختا جہانزیب بلوچ نا خاہوت نا پاننگ اس کہ جہانزیب بلوچ ئے سئے مئی اِرا ہزار شانزدہ (2016) ٹی شال آن بیگواہ کننگانے۔ او درزیس اس۔ برانز ئٹ جہانزیب بلوچ تون اوار غُٹ بیگواہ مروک بلوچ آتا آجوئی نا خواست کننگا۔
شال ئنا ہَندی جہانزیب بلوچ نا خاہوت پارے کہ او درزی گِری نا کاریم کریکہ و برامی ءُ بندغ اسے ہرانا مسڑ ودی مننگ آن پد برانز کننگ ئٹی ءِ۔
جہانزیب نا لمّہ پارے کہ معصومہ اونا مار ئنا اسٹ انگا چُنا ءِ، ہراتم جہانزیب ئے بیگواہ کننگا تو او وختا معصومہ نا سن بیرہ شش تُو اسّک۔
گل سیمہ پارے کہ ہنوکا ہشت سال آن نہ بیرہ او بلکہ اونا خاہوت نا غُٹ بندغ آک ڈکھ آتا گْواچی ءُ، ننے آن تُغ پُھلنگانے نن ناجوڑی تا گواچی مسونن و داسا بس دارو تا زیہا زندہ اُن۔
ایسر ئٹی برانز کروکا پاریر کہ اگہ اوڑا ڈوہ ئس ارے تو اودے عدالت آ ہتنگ مرے۔
