وائس فار بلوچ مسنگ پرسنز نا سیکریٹری جنرل و بندغی حق آتا باسک سمی دین بلوچ ئے پاکستان نا کراچی ائیرپورٹ آ ہموتم توننگا ہراتم او عمان آ ہِننگ اس۔
دا رد ئٹ سمی دین چاگڑدی میڈیا نا پلئٹ فارم ایکس آ ائیرپورٹ نا امیگریشن آفس و اسہ لیٹر ئسے نا عکس آتے شنگ کرسا پارے کہ کنے اینو مسقط، عمان آ ہننگ نا وختا کراچی ائیرپورٹ نا امیگریشن کاؤنٹر آ توننگانے۔
اونا پاننگ اسک کنے ایف آئی اے کالخواک پارینو کہ محکمہ داخلہ نا کنڈ آن اسہ چھٹی ئسیٹی پاننگانے کہ بلوچستان حکومت کنا پن ئے ایگزٹ کنٹرول لسٹ ئٹی شاغانے۔ کنے چار گھنٹہ اسکان سیکیورٹی نا کوٹی ٹی ودار کن تولیفینو و کنے جاگہ ئس ہننگ نا ہم اجازت اف۔
سمی دین مُستی پارے کہ کنا پاسپورٹ ئے واپس کننگ افس و نئے کنے پین ثبوت ئس تننگ ءُ کہ کنے اَرا بنیات ئٹ سفر نا جازت تننگ افس۔
