بلوچستان ئٹی پھر تا سوب آن سینزدہ چُنا تون اوار سی و سئے بندغ بیران مسنو، ہندن یانزدہ چُنا تون اوار پانزدہ بندغ ٹھپی مسنو۔
بلوچستان ئٹی بھاز آ علاقہ آتیٹ پِھرک نسخان کرینو، ہراڑان کسر تے، کچّا غا اُرا تے نسخان ریسنگانے۔ شال چمن نا کسر ئے ہم بھاز آ جاگہ غا تیان دیر درینے۔ زوراک آ پھر تیان بلوچستان ئٹی کیہی علاقہ آتیٹ موبائل، انٹرنیٹ و بجلی کاریم کننگ ئے الّانے۔
بلوچستان ئٹی قلعہ سیف اللہ، خضدار، لورالائی، جھل مگسی، سبی، جعفر آباد، نصیر آباد، لسبیلہ و بولان ٹی زوراک آ پھر تیان ہاوار آ علاقہ آتیٹ لوڑو بسّنے۔ قلات، زیارت، صحبت پور، لسبیلہ، آواران، جعفر آباد، اوستہ محمد، لورالائی، چاغی و جھل مگسی ٹی زْیات نسخان مسنے۔
چمن، قلعہ عبداللہ، قلعہ سیف اللہ و زیارت ٹی لوڑو آن باغ و فصل آک نسخان مسّنو۔ ہندن کیہی کلومیٹر کسر تے، پُہل آتے و اُرا تے ہم دیر درینے۔ حکومتی حوال نا حساب آ قلعہ عبداللہ و قلعہ سیف اللہ ٹی بھاز آ بندغاک بےاُرا مسّنو۔
پی ڈی ایم اے نا پاننگ ءِ کہ یک جولائی آن سینزدہ چُنا تون اوار دائسکا سی و سئے بندغ پھر تیٹ بیران مسنو و پانزدہ ٹھپی ءُ۔
پھر تیان پنچ سد و پنجاہ ع ہشت اُرا تیبہ تمّانو و نُہہ سد و ہشتاد و شش گڑاس نسخان مسّنے۔ اسہ لکھ آن گیشتر بندغ پِھر تیان زیمی مسّنو۔ ہندن پنجا و ہشت ہزار ہفت سد و نوَد و نُہہ ایکڑ آ تالان فصل آک خراب مسّنو۔ لوڑو تیان سئے سد و ہفتاد و سئے مال کھسکنے و بھلا کسر تا ہفت پُہل ئے نسخان رسینگانے۔
زوراک آ پھر تیان پد شال چمن ریل ئنا کسر بند مسّنے۔ خوجک ٹنل لوڑو نا ہتوکا مِش تیان پُھر مسّنے، ہندن ہرنائی آ ہِن ءَ بر نا وسیلہ آک سلیسُنو۔ربی کینال ٹی کھونڈ ملِنگ آن بھاز آ کِلی تہ دیر ہلکنے و سندھ بلوچستان سیمسر آ لیویز چوکی ئے ہم لوڑو درینے۔
