بلوچ خوانندہ گَل بی ایس او پجار نا بنجاہی جارکش پارینے کہ مکران میڈیکل کالج نا خوانندہ آک ہنوکا کیہی دے آن تینا درست و بنداوی حق آتیکن برانز کننگ ئٹی ءُ، بی ایس او پجار اوفتا غُٹ جائز خواست آتا مخ تفی ئے کی و خواست کیک کہ خوانندہ آتا مطالبہ غا تیا امنا کننگ مرے۔
بنجاہی جارکش پارینے کہ بلوچستان نا بھاز آ میڈیکل کالج آتا ہندا حال ءِ، کرپشن خواننگ نا ادارہ آتے برباد کرینے۔ حکومت و حاکم آک کرپشن، ٹھیکہ و کمیشن آتیٹ لگّوک ءُ ولے ننا خواننگ نا ادارہ آک ویتہ کمک آن تمّوک ءُ۔ کالج انتظامیہ خوانندہ آتا حق آتے تننگ ئٹی اف خوانندہ آک خواننگ نا وختا برانز کننگ ئٹی ءُ ہرا نن کن افسوس نا ہیت اسے۔
او پارے کہ تربت نا باسُنی ٹی داخسا بھلا ادارہ ٹی ہنوکا شش دے آن بجلی اف، جرنیٹر و پین آسراتی سے نا بےمننگ آ، کالج انتظامیہ، حکومت و حاکم آتے لجّی مروئی ءِ۔
بنجاہی جارکش نا پاننگ اس کہ کالج انتظامیہ و حکومت زو ئس مکران میڈیکل کالج نا خوانندہ آتا خواست آتے منّر، اگہ او خوانندہ آتا خواست آتے منّتوَس اوفتا دا برانز نا حق ئٹی بی ایس او پجار مچّا بلوچستان ئٹی برانزی تحریک چلّفو۔
