بلوچستان نا دریابی شار گڈانی ٹی سمند نا کرّک آ کھئوکو وہیل مچھی ئس خننگانے۔
حوال تا رِدئٹ بلوچستان نا دریابی شار گڈانی ٹی درو کھئوکو وہیل مچھی ئس خننگانے ہرانا مُرغنی پنچ آن شش فٹ و وزن تَہ ہفتاد آن ہشتاد کلو گرام پاننگک۔
یات مرے کہ شپ بریکنگ یارڈ گڈانی آ چُھٹوکا بیڑی تیان آئیل و پین کیمیکل سمندر ٹی تمک ہراڑان سمندر خراب مرسا دیر ئنا سہدار تے نسخان تیک، حکومتی نا کنڈ آن سمندر نا رکھ ئکن گھام ہفنگ مفک۔
گڈانی تون اوار حبکوڈام بھڈی واری، ہنگول و مچھی ہلّنگ نا شعبہ ئے بھلو نسخان رسینگنگ ئٹی ءِ، ایلو کنڈ آن محکمہ ماحولیات و ایلو ادارہ آتا بے چکاری آن مچھی ہلوک آک اِرا وخت ئنا اِرغ کن رُلرہ۔ حکومت شپ انڈسٹری نا مالک آتے پابند کے کہ خراب انگا بیڑی تیان پیشتموکا کیمیکل و آئیل آتے سمندر آن مُر شولنگہ۔
یات مرے کہ مہالو آن ہم بھاز وار سمندر نا خُش آ مُڑدہ ءُ مچھی خننگانے۔
