بلوچستان نا ضلع قلات نا ہند جوہان ئٹی پاکستانی لشکر و سلاہ بند بندغ آتا نیامٹ بھلو جھڑپ نا حوال مونا بننگ ءِ۔
حوالکار آتا رد ئٹ قلات نا ہند جوہان ئٹی گیشک نا ہند آ لشکر نا کنڈ آن لشکر کشی تدوکا اِرا دے آن برجاء ءِ۔
پاننگک کہ لشکر کشی ٹی ایس ایس جی کمانڈو، ائیر فورس تون اوار پاکستانی لشکر نا پین کیہی شعبہ بشخ ہلنگ ءُ۔
جوہان آن رسینگوکا حوال تا رد ئٹ گیشک نا ہند آ لشکر 22 اگست آن سرمچار تا کیمپ ئسے گھیرہ ٹی ہلکنے ہرانگا لشکر و سرمچار آتا نیام ئٹی جھڑپ مسنے۔
ہندی حوالکار آتا رد ئٹ اینو کوئٹہ آن اَسہ وار ئس ولدا کم آن کم ہفت لشکری ہیلی کاپٹر تے ضلع قلات گیشک آ ہِننگ آ خنانو۔
دائسکان پاش افک کہ ہیلی کاپٹر کھئوکا و ٹپی مروکا تا جانجوڑی کمک کن ہنانے یا آپریشن ئٹی شیلنگ کننگ نا مسخت ئٹ۔
ہندی حوالکار آک شابیتی حوال ئٹ پاریر کہ ہندا گھیرہ ٹی لشکر نا کیہی ہیلی کاپٹر آ تیان ایس ایس جی کمانڈوک دھڑنگانو و وقتا فوقتا گن شپ ہیلی کاپٹر نا زریعت ئٹ سرمچار آتا ٹھکانہ تیا شیلنگ کننگ ءُ۔
ایلو نیمہ غا حوالکار آتا دعوی ءِ کہ بلوچ سرمچار آک راکٹ و ایلو سلاہ تیٹ لشکر تون مون تننگ ءُ۔
ہندی حوالکار آتا دعوی ءِ کہ جھڑپ تا وختا خُڑک ئنا ہند آتیٹ لشکری ایمبولینس خننگانے، مَنہ ہند آتیا جتاء لاری تیٹ کھئوکا، ٹپی مروکا لشکری کارندہ آتے خنانو۔
واہم لشکری و سول کالخواہ تا نیمہ غان دائسکان ہندا سلاہ بند جھڑپ آ تیٹ جانی نسخان نا حوالہ ئٹ ہچ وڑ ئنا خبر پک متنے۔ و نہ سلاہ بند تنظیم آتا کنڈ آن دا رد ئٹ میڈیا ٹی درشان شنگ کننگانے۔
