بلوچستان نا ضلع بولان و مستونگ ئٹی پاکستانی لشکر نا بھلو کچ ئسیٹی لشکر کشی برجاء ءِ ہراٹی گن شپ ہیلی کاپٹر آک بشخ ہلنگ ءُ۔
اینو سہب ئنا پاکستانی لشکر مستونگ نا علاقہ مرو، ریشی، گیشک، شیشار و ہیب کھیب ئٹ لشکر کشی بناء کرینے۔ کم آن کم ہفت ہیلی کاپٹر علاقہ ٹی خننگانو ہرافتے جتا ہند آتیا شیلنگ کننگ آ خننگ مسنے۔
اِرا دے مُست ہم مستونگ ئٹی لشکر کشی کننگاسس ہراڑے پاکستانی کوالخواک جھڑپ آتیٹ مُسہ آجوئی دوست کھسفنگ نا دعوی کریسر۔
اندن بولان نا علاقہ مچھ، روشی، آب گم و مارگٹ ئٹی فوجی ہیلی کاپٹر آتا ہن و بر برجاء ءِ۔
حوال تا رد ئٹ بھلو کچ ئسیٹی زمینی و فضائی لشکر کشی برجاء ءِ۔
پاکستانی کوالخواک دائسکان دا بارو ئٹ ہچو شابیتی حوال تتنو۔
تدوکا دے تیٹ کوئٹہ نا ہیب کھیب ئنا علاقہ زرغون ئٹی اِرا دے اسکان لشکر کشی کننگاسس ولے کوالخواک تا کنڈ آن دا بارو ئٹ ہچو تران متو۔
پاکستانی لشکر نا ‘آپریشن عزم استحکام’ نا پڑو آن پد تیبہ بلوچستان ئٹی لشکری سر پھر ئٹی ودکی مسنے، جتا علاقہ آتیٹ بھلو کچ ئسیٹی جنگی مڈی تا دننگ ہتنگ خننگ مسنے۔
