بلوچستان نا دریابی شار و ضلع گْوادر نا تحصیل پسنی شار ئٹی بیلسٹک میزائل شاہین 2 ئنا چکاس آن آبادی ٹی بیم و خلیس ودی مسُنے۔
پاکستان پسنی شار ئٹی جبل زرین نا ہند آ سمندر ئٹی بیلسٹک میزائل شاہین نا اِرا چکاس کرینے۔ ترند تراک آن پسنی نا ہند جُمبانے، ہراڑاج ہندیک بیم ئنا گواچی مرسا رُمب کرسا اُرا تیان پیشن پیشتمانو۔
حوالکار آتا پاننگ ءِ کہ سئے شمبے نا سُہب ئنا دہ بجہ نا وختا پسنی نا دے ٹک پاسو آن اِرا تراک نا تور بس، تراک آن پسنی نا ہند ریک پشت ٹی اُرا تا چھت، دروازہ و کھڑکیک جُمبانو ہراڑان بندغ آک رُمب کرسا اُرا تیان پیشتمانو، واہم کس ئے ہم معلومداری متنے کہ تراک اَرانگا و اَرا وڑ ئنا سے۔
خنوکا تا رد ئٹ تراک نا توار پسنی شار نا تہٹی ساڑی جبل زرین آن خُڑک آن بسُنے۔
ایلو نیمہ غا مچھی ہلوکا تا پاننگ ءِ کہ پاکستان نیوی و کوسٹ گارڈ آتا کارندہ آک اوفتے جبل زرین نا خڑک مچھی ہلنگ آن دا پارِسہ نمن کریسر کہ دانگا فوجی کاریم مننگ ءِ۔
حوالکار تا پاننگ ءِ کہ پاکستان سمندر ئٹی جبل نور آن خُڑک زمین آن زمین آ خلوکا بیلسٹک میزائل شاہین 2 نا سرسوب چکاس کرینے، و پسنی ٹی مروکا تراک نا توار ہمو میزائل نا اسک۔
پاکستانی لشکر نا شعبہ عامہ سئے شمبے آ شنگ کروکا درشان ئٹی پارینے کہ پاکستانی بیلسٹک میزائل شاہین 2 نا چکاس کرینے و درشان ٹی پارے کہ دا تجربہ نا مسخت لشکری تربیت، جتاء تکنیکی پیرامیٹرز نا شابیتی و جوان درستگی و گچین بقا کن جتاء ذیکی نظام آ تا کارکردگی تے ہُننگ اسک۔
آئی ایس پی آر میزائل نا عکس ئے شنگ کرے، درشان ئٹی دا پاننگتنے کہ دا تجربہ پاکستان نا اَرا ہند ئٹی کننگانے۔
