بلوچستان نا ضلع نوشکی آن خُڑک ڈیورنڈ لائن آ پاکستان و اوغان لشکر نا نیامٹ جھڑپ مس ہرا نا سوب آن اَسہ پاکستانی لشکر نا کارندہ ئس مرگ ئنا گواچی مس۔
پاکستانی کالخواہ تا رد ئٹ دا جھڑپ یک شمبے نا سُہب کوئٹہ آن 200 کلو میٹر مُر ضلع نوشکی نا ہند گزنلی ٹی مسُنے۔
ڈپٹی کمشنر نوشکی امجد حسین سومرو جھڑپ ئے پک کرے، و ودیک ہیت کننگ آن نمن کرے۔
پاننگک کہ دا جھڑپ ہموتم بناء مس ہراتم فرنٹیئر کور بلوچستان نوشکی ملیشیا 102 ونگ نا کارندہ گزنلی چیک پوسٹ ٹاور نمبر شش آن خُڑک ڈیورنڈ لائن آ پاکستان نا کنڈ آن خلنگوکا واڑ تے جوڑ کننگ اسُر کہ ہمو جاگہ آ واڑ ئے پِننگ نا حوال رسینگاسس۔
ہراتم ایف سی کارندہ خُڑک ہنا گُڑا سیم آن ہپار اوغان لشکر نا سلاہ بند کارندہ آک سُم کاری بناء کریر ہراڑان ایف سی صوبیدار طارق اقبال ٹپی مس۔
ایف سی کارندہ آک ہم ورندی ٹی سُم کاری کریر ہراکہ اَسہ گھنٹہ اِسکان برجاء مس۔
27 سالی صوبیدار طارق نا پِھڈ ئٹی سُم لگاسس، ٹپ آتے وے سگِسہ او کھسک۔ اونا جون آبائی ہند خیبرپختونخوا نا ضلع لکی مروت آ راہی کننگا۔
