پِھر تا سوب آن کیہی اُراک تمانو، کسرک بند، ہندن بھاز آ تدینی تیٹ مالࣿک ہم کھسکنو۔
بلوچستان ئٹی اسہ وار ولدا پِھر تیان نسخان مس و کیہی جاگہ آتتون حال حوال پنا، زوراک آ پِھر تیان پد شیفکو علاقہ آتیٹ دیر سلیسنے و لوڑو تیان کیہی بندغ آتا مڈی تے دیر درینے، حال حوالی نظام ئے ہم نسخان رسینگانے۔
چمن و قلعہ عبداللہ ٹی دا وختا زیات پِھر مننگ ئٹی ءِ۔ زمان آباد ئٹی دیر اُرا تیٹ پیہانے۔ زوراک آ چِھرک آتیان کیہی بندغ آتا شمسی پلیٹ آتے نسخان مسنے۔ جعفر آباد ئٹی بجلی نا کھمبہ آک تمانو، شال، چمن و نوشکی ٹی ریل ئنا کسر ئے لوڑو درینے ہرانا سوَب آن ریل ئنا ہِن ءَ بر سلیسنے۔ پِھر تا سوب آن مروکا کیہی تدینی تیٹ دہ بندغ ٹھپی مسنو۔
مستونگ ئٹی پِھر ئنا لوڑو آن کیہی ہند آ تیا اُرا تِہ نسخان ہم رسینگانے۔ کردگاپ ئٹی نیاڑی سے دیر دریسس ہرانا جون اینو خننگانے۔
ایلو نیمہ آ زوراک آ پِھر تیان بولان ئٹی بنجائی دگ ئنا شیفکو جاگہ آتے دیر ہلکنے ہراڑان گاڈی تا ہِن ءَ بر بند مسنے۔ ہرک کازوے نا سند آ لوڑو ٹی کیہی گاڈیک گھٹ مسنو۔
این ایچ اے نا پاننگ ءِ کہ لوڑو تا سوَب آن بلوچستان نا پیشن نا علاقہ آتتون ہِن ءَ بر سلوک ءِ۔ لوڑو تیان شال، تفتان و سبی نا بنجائی کسرک بند ءُ۔
ہندن کوڑیانک سارونہ خضدار بلوچستان ئٹی گِروک تمنگ آن عمران دینارزئی و محمد اسماعیل دینارزئی مینگل پِنی آ شْوانک بیران مسنو۔
عمران و اسماعیل آ ہموتم گروک تمّا ہراتم او تینا کُھر ئے اُرا غا ہتنگ ئٹی اسر۔ گروک ئٹی ہڑتوماک جہہ آ ساہ تسر و گروک آن یانزدہ ہیٹ، میڷ ہم کھسکنو۔
نوشکی شار آ ہنوکا بھلا پُہل ئنا کُنڈ آتے دیر وہینگ آن شار ئنا کسر بند مس۔ لوڑو اسہ گاڈی سے ہفے ولے بندغ آک بچار۔ کیشنگی ٹی پاکستان و ایران نا ریل ئنا کسر ئے دیر درینے۔
ایلو کُنڈ آ محکمہ مُد بروکا منَہ دے اسکان گیشتر پَر ئنا پارینے ہندن بھاز آ کسر تیٹ مخلوق ئے پنت تننگانے کہ او دا وختا سفر کپس۔
