بلوچستان نا ضلع کیچ آن پاکستانی لشکر اَسہ بندغ ئسے دزگیر کننگ آن پد بیگواہ کرینے۔
بیگواہ مروکا ورنا نا چاہنداری امید نا مار کمبر نا پِن ئٹ مسُنے۔
حوالکار آتا رد ئٹ پن کروک ورنا ئے درو شام ئنا یک بجہ نا وختا پاکستانی لشکر کیچ ئنا ہند بلیدہ بگ ئٹی چھاپہ خلِسہ دزگیر کرینے ہراکان گڈ اونا بابت ئٹ معلومداری اف کہ او اَرانگا و انت حالیت ئٹی ءِ۔
خیال ئٹ مرے کہ بلوچستان ئٹی زوراکی نا بیگواہی تا تُدینیک چرجوئی ئٹ رپورٹ مننگ ءُ۔ درو خاران آن پاکستانی لشکر اِرا بندغ ئے دزگیر کننگ آن پد بیگواہ کرینے، ہرانا برخلاف دا وخت خاران ریڈ زون ٹی اوفتا خاؤت نا برانز برجاء ءِ۔ داکان بیدس درو گوادر، اوتھل و کوئٹہ آن ہم زوراکی ئٹ بیگواہی نا تُدینیک رپورٹ مسُنو۔
یاتی مرے کہ پن کروک ورنا داکان مُست ہم زوراکی نا بیگواہی تا گواچی مسُنے۔ ہرا ہفت دے آن پد آجو مسس، داسہ اَسہ وار ئس ولدا پاکستانی لشکر اودے زوراکی ئٹ بیگواہ کرینے۔
