بارکھان نا جتا علاقہ آتیٹی بلوچستان لبریشن فرنٹ نا کنڈ آن پمفلیٹ بشخنگ مسنے، ایلو کنڈ آن اِستو جھاؤ ٹی سلاہ بند بندغ آک پاکستانی لشکر نا چوکی آ جلہو کرینو۔
حوال تا رد ئٹ بارکھان شار ئٹی اِستو بی ایل ایف نا سرمچار آک بھاز آ اسکول آتیٹی پمفلیٹ بشخانو۔ پمفلیٹ ئٹی کُل بندغ آتے چاہنداری تننگانے کہ 14 اگست نا ردئٹ تیوہ غا بلوچستان ئٹی ہر وڑ ئنا سرگرمی تیا رکھ ءِ۔ اندا سوب آن بی ایل ایف بلوچ الس آن خواست کیک کہ اوفک کوزہ گیر پاکستان نا پن ئنا آجوئی نا مجلس آتیان تینے مُر تخِر، ننا سرمچار آک ہروخت ہر جاگہ غا جلہو کننگ کیرہ۔
ایلو کنڈ آن جھاؤ ٹی اِستو شام ئنا چھار بجہ غا نوندڑہ ٹی دل ئنا ہند آ جوڑ مروک پاکستانی لشکر نا چوکی آ سلاہ بند بندغ آک جلہو کرینو۔
پاننگک کہ جلہو بھاز ہُرے اسکان برجاء مسنے۔ ہرانا سوب آن پاکستانی لشکر ئے بھاز نسخان رسینگ نا حوال ہم ارے۔
یاتی مرے دا منَہ دے ئٹی بلوچستان نا جتا علاقہ آتیٹی سلاہ بند بندغ آک پاکستانی لشکر نا چوکی و کیمپ آتے ٹک کرینو ہرافتا زمہ واری تے بی ایل ایف تون اوار ایلو تنظیم آک ہرفینو، ولے دا جلہو نا ذمہ واری ئے دائسکان ہچو تنظیم ئس ہرفتنے۔
